Nyuma y’agace ka Nyabyondo ko muri Masisi inyeshyamba zo mu mutwe wa M23 zigaruriye ku Cyumweru tariki ya 9 Werurwe, uyu mutwe wanigaruriye uduce twa Busoro na Kaanja.
Inyeshyamba ziyobowe na Gen Sultani Makenga zigaruriye utu duce twombi nyuma yo kutwirukanamo ingabo za Leta ya Congo n’abarwanyi b’umutwe wa APCLS bazifasha ku rugamba.
Kugeza mu gitondo cyo kuri uyu wa Mbere amakuru yavugaga ko M23 iri mu bilometero bibarirwa muri bitanu uvuye mu gace ka Kashebere gaherereye mu rugabano rwa Teritwari ya Masisi n’iya Walikale.
Uyu mutwe kandi wari mu bilometero bibarirwa muri 80 uvuye muri Centre ya Walikale; ndetse no mu bilometero bibarirwa mu 150 uvuye ahakorera Sosiyete icukura amabuye y’agaciro ya Alpha Mine.
Ibirombe iyi sosiyete y’abanya-Canada icukuramo amabuye y’agaciro biza mu bya mbere bicukurwamo amabuye yo mu bwoko bwa gasegereti ku Isi.
