Iteka rya Perezida No. 33/01 ryo ku wa 03/09/2012 rigena imiterere n’inshingano zihariye bya buri cyiciro kigize ingabo z’u Rwanda. Ingingo ya kabiri yaryo ivuga ko izi ngabo zibumbiye mu byiciro bitatu: Ingabo zo ku butaka (RLF: Rwanda Land Force) , izo mu kirere (RAF: Rwanda Airforce) n’Inkeragutabara (NRF: National Reserve Force).
Iri teka rivuga ko ingabo zirwanira mu kirere, zikora akazi ka gisirikare mu buryo buhoraho, mu gihe Inkeragutabara ari icyiciro cy’ingabo zidakora akazi ku buryo buhoraho ariko zishobora kwitabazwa igihe cyose bibaye ngombwa.
Inshingano za RAF
Bigaragara mu mutwe wa III w’iri teka, ku ngingo ya 7 igaragaza imiterere y’ingabo zirwanira mu kirere n’ubuyobozi bwazo.
Ingabo zirwanira mu kirere zigizwe n’imitwe y’indege ziguruka, umutwe ushinzwe ubusugire bw’ikirere n’amashuri y’ingabo zirwanira mu kirere.
Izi ngabo zigomba kugira abasirikare bahora biteguye intambara, bafite ubumenyi bunyuranye kugira ngo bahorane ubushobozi bwo guhora ku isonga mu gukumira ibitero cyangwa kubigaba mu buryo buhamye, bikorewe mu kirere.
Izi ngabo ziyoborwa n’Umugaba w’Ingabo zirwanira mu Kirere, Maj. Gen. Emmanuel Bayingana.
Maj. Gen. Emmanuel Bayingana, Umugaba wa RAF
Amapeti y’ingabo zirwanira mu kirere
Amapeti y’ingabo zirwanira mu kirere nta kinini atandukaniraho n’andi muri rusange, keretse ko ibirango byayo biba bidoze ku gatambaro k’ubururu ndetse n’akarango k’inuma kaza kuri ba ‘Warrant Officers’. Ni aya akurikira:
1. General
2. Lieutenant General.
3. Major General
4. Brigadier General
5. Colonel
6. Lieutenant Colonel
7. Major
8. Captain
9. Lieutenant
10. Second Lieutenant
11. Warrant Officer 1 (uturongo dutatu n’inuma hejuru)
12. Warrant Officer 2 (uturongo tubiri n’inuma hejuru)
13. Sergeant Maj (akarongo kamwe n’inuma hejuru)
14. Staff Sergeant
15. Sergeant
16. Corporal
17. Private (iri nta kirango rigira)
Ibi ni ibirango by’amapeti ya RAF guhera kuri General kugera kuri Corporal
Ibikoresho ingabo zo mu kirere zikenera
Dushingiye ku makuru aturuka mu mbuga z’ibisirikare bya USA, u Burusiya na Misiri muri Afurika, dusanga ingabo zo mu kirere zigira ibikoresho hafi ya byose bikenerwa mu gisrikare; zikagira umwihariko wo kugira indege z’intambara zo mu bwoko butandukanye zaba za kajugujugu, indege zitwarwa n’abapilote zinyaruka (fighters), inini zitwara abasirikare n’utudege twoherezwa kuri ‘mission’ nk’ututagira abapilote (drones). Hiyongeramo kandi intwaro nini n’intoya, ibisasu biremereye n’ibitoya, ibiturika, imitaka (parachutes) n’ibindi.
Kugira ngo igisirikare cyo mu kirere gikomere, bisaba gukorera hasi ndetse no mu mazi cyangwa gukorana n’ibindi bisirikare, nk’igihe bibaye ngombwa ko gihanura indege y’umwanzi kiyiturutse hasi, ni ngombwa ko cyaba gifite imodoka y’intambara cyangwa imbunda iri hasi, izifasha kuyihanura. Ni kimwe no mu mazi, aho biba ngombwa ko igipimo cyiza (target) kiboneka ushaka kurasa ari mu mazi. Biba ngombwa ko akenera ibikoresho bimufasha kwinjira mu mazi n’ibimufasha guhumekeramo.
Imikoranire hagati y’ingabo kandi igaragara mu bihugu byateye imbere mu bya bisirikare, aho biba ngombwa ko amato manini ari yo atwara indege z’intambara, zikoherezwa aho zishinga ibirindiro mbere yo kujya ku rugamba. No mu gihe cy’imyitozo, ibi bikoresho byose birakenerwa.
Uretse iterambere ritandukanya ibihugu, ingabo zo mu kirere zifite imiterere isa ndetse zifite ibikoresho byinshi zihuje. Ibi twagaragaje haruguru biri mu byo ingabo z’u Rwanda zo mu kirere zifite, cyane cyane nka kajugujugu, imitaka n’imodoka nk’uko bigaragara ku rubuga rwa RDF.
