Ikipe ya FC Barcelona yamaze kugera ku bwumvikane na Lionel Messi usanzwe ari Kapiteni wayo gahunda yo gusinya amasezerano mashya muri iyi kipe y’i Catalunya.
Biteganyijwe ko Messi mu mpera z’uku kwezi azasinya amasezerano mashya y’imyaka itanu yo gukinira FC Barcelona nk’uko ibinyamakuru bitandukanye byandika siporo i Burayi byabitangaje.
Bijyanye n’ingaruka icyorezo cya COVID-19 cyateje hirya no hino ku Isi kitaretse n’ikipe ya FC Barcelona, biteganyijwe ko Messi agomba kugabanya umushahara we ku kigero cya 50%, ibisobanuye ko azajya ahembwa angana n’ama-Euro miliyoni 20 ku mwaka.
Imwe mu ngingo ikubiye mu masezerano ya Messi ivuga ko ikipe iyo ariyo yose yamwifuza amasezerano ye atararangira yamugura angana n’ama-Euro miliyoni 600.
Lionel Messi agiye kongera amasezerano muri FC Barcelona, mu gihe iyi kipe iri mu nzira zo gutandukana n’Umufaransa Antoine Griezmann.
Amakuru avuga ko Griezmann uri mu bahembwa amafaranga nenshi muri FC Barcelona ashobora gusubira muri Atlético Madrid yahoze akinira, hanyuma iyi kipe ikamugurana na FC Barcelona umunya-Espagne Saùl Niguez ukina hagati mu kibuga.
