Ubuyobozi bukuru bwa Uganda Airlines bwongeye gucanwaho umuriro nyuma y’ubugenzuzi budasanzwe bwerekanye ko miliyoni 9.2 z’Amadolari ( miliyari 35.2 Shs) z’amafaranga anyuranyije n’amategeko yishyujwe abagenzi nk’aya serivisi bahawe, abagenzuzi bavuga ko adashobora kuboneka kuri konti y’isosiyete kandi ashobora kuba yaranyerejwe.
Raporo y’Ubugenzuzi Budasanzwe bw’Ubugenzuzi Bukuru ku micungire y’imisoro n’imicungire y’amavuta y’indege mu mwaka wa 2021/22 kugeza 2023/24 yasanze ko nubwo hakuweho amadolari 30 ya serivisi yo kugura amatike guhera ku itariki ya 1 Nyakanga 2023, abakozi ku biro byinshi hamwe n’abakozi bashinzwe kugurisha amatike (GSAs) bakomeje kwishyuza amafaranga umwaka wose.
Email yo ku itariki ya 26 Kamena 2023, yanditswe n’Umuyobozi ushinzwe imicungire y’imisoro, yerekanaga neza ko “guhera ku itariki ya 1 Nyakanga 2023, amadolari 30 y’Abanyamerika ya serivisi yo kugura amatike atazongera gusabwa.”
Nyamara, nk’uko byagenzuwe, “isesengura rya raporo irambuye y’ubucuruzi bwakozwe mu gihe cyo kuva ku itariki ya 1 Nyakanga 2023 kugeza ku ya 30 Kamena 2024 ryerekanye ko amafaranga ya serivisi angana na 9.294.640 USD yishyujwe ku biro byinshi bya Uganda Airlines n’abakozi bashinzwe kugurisha amatike.”
Igihangayikishije kurushaho nk’uko abagenzuzi bavuga, “Nta kimenyetso cyerekana ko aya mafaranga ya serivisi yakusanijwe yageze muri banki, ibizamura impungenge zerekeranye no kunyereza umutungo.”
Imiyoborere ijegajega
Raporo yagiye kure, igaragaza kunanirwa kw’imiyoborere ku buyobozi bukuru bwa sosiyete y’indege nk’uko iyi nkuru dukesha chimpreports ivuga.
Abagenzuzi b’imari bagize bati: “Nta kimenyetso cyemeza ko Inama y’Ubutegetsi yemeje ko politiki ihinduka.”
Ati: “Kudashyira mu bikorwa impinduka za politiki no kumenya ko byubahirizwa byatumye hakusanywa amafaranga ya serivisi mu buryo bunyuranyije n’amategeko, na risque zo kutabitswa muri banki no kunyerezwa. Byongeye kandi, gushyira mu bikorwa iyo politiki yinjiza amafaranga bitabanje gutangirwa uruhushya n’Inama y’Ubutegetsi bibangamira gukurikiranwa kandi bigaca intege imiyoborere.”
Ubugenzuzi bwagaragaje ko aya mahano yo “kutubahiriza amabwiriza kw’abakozi ba sitasiyo zibishinzwe, bishoboka ko byatewe n’ubugenzuzi budahagije…..”
Abagenzuzi b’imari bakora ku mabwiriza ya perezida bategetse Uganda Airlines “gukora iperereza ryimbitse kugira ngo hamenyekane impamvu 9.294.640 USD y’amafaranga ya serivisi yishyuwe mu buryo bunyuranyije n’amategeko kandi niba amafaranga yarabikijwe muri banki cyangwa yaranyerejwe,” bongeraho ko: “Aho amafaranga atigeze abitswa muri banki, kuzabibaza abakozi babishinzwe kandi ifate ingamba zikwiye, harimo no guhana cyangwa kugaruza amafaranga.”
