Minisitiri w’Ubuzima wa Madagascar, Ahmad Ahmad ku wa 20 Nyakanga 2020 watabarije igihugu cye ngo kibone ubufasha bwo kurwanya icyorezo cya Covid-19 ari kotswa igitutu.
Ni mu gihe Perezida w’iki gihugu, Andry Rajoelina, mu mezi ashije yatangaje bavumbuye umuti w’iki cyorezo witwa Covid-Organisms ukozwe mu kimera cy’iwabo cyitwa Artemisia.
Minisitiri Ahmad Ahmad yatabaje nyuma y’aho abayobozi b’ibitero muri Madagascar, cyane cyane mu murwa mukuru, Antananarivo, batangaje ko ibitanda byo kwakiriraho abarwayi ba Covid-19 byabashiranye, mu gihe umubare w’abandura uzamuka cyane.
Yagize ati: “Dukeneye byihutirwa amacupa y’umwuka wa Oxygene, imashini zifasha guhumeka 337, udupfukamunwa miliyoni 2.3, uturindantoki 697,000 n’imyambaro y’abaganga 533,200.”
Guverinoma ya Madagascar ikimara kumva impuruza ya Minisitiri Ahmad Ahmad, tariki ya 21 Nyakanga yaramunenze kuko ngo yabikoze atayigishije inama ndetse ntiyanabaza Perezida Rajoelina ubwe.
Itangazo rigira riti: “Guverinoma ibabajwe no kubona ibaruwa yashyizweho umukono na Minisitiri w’Ubuzima busaba ubufasha mu kurwanya Covid-19. Ubusabe bwa Minisitiri ni igitekerezo cye yatanze atabajije guverinoma cyangwa Rajoelina.”
Nk’uko Ibiro Ntaramakuru by’Abafaransa, AFP, byabitangaje, Guverinoma ya Madagascar binyuze mu muvugizi wayo, Lalatiana Rakotozafy, irashinja Minisitiri Ahmad Ahmad uruhare mu izamuka ry’imibare ya Covid-19, nabyo bikaba bigaragara muri iri tangazo.
Umuti wa Covid-Organics wemejwe na Perezida Rajoelina tariki ya 20 Mata 2020, ibihugu bitandukanye byiganjemo ibyo muri Afurika nka Chad, Senegal, RDC, Tanzania, Comores, Guinée Bissau, Guinée Equatoriale na Congo. Uyu Mukuru w’Igihugu yemeje kandi ko na Leta Zunze Ubumwe z’Abarabu zawumusabye tariki ya 3 Kamena 2020.
Umuryango mpuzamahanga wita ku buzima, OMS, watangaje ko utakwemeza Covid-Organisms nk’umuti wa Covid-19 mu gihe utarawukoraho ubushakashatsi binyuze mu buryo bwemewe. Byagaragaye ko nta cyo uyu muti ukora ubwo muri Madagascar imibare y’abandura yakomeje kwiyongera, bituma Rajoelina ashyira muri Guma mu Rugo Antananarivo mu ntangiriro z’uku kwezi.
Minisitiri Ahmad Ahmad ashobora kwirukanwa nka Rijasoa Andriamanana wari Minisitiri w’Uburezi, wirukanwe tariki ya 4 Kamena 2020 nyuma yo gutangaza ko agiye gushora amafaranga miliyoni 2.2 z’amadolari y’Amerika, mu kugurira abana amabombo zajya abafasha kuwunywa neza, mu rwego rwo kugabanya ubukarihe bwawo.
Abamaze kwandura Covid-19 muri Madagascar ni 8162, abagera kuri 80 % ni abapimwe muri Kamena 2020,. Aba barwayi barimo 69 bapfuye.
