Mu gitondo cyo kuri uyu wa Kane tariki ya 4 Nyakanga 2024, Abanyarwanda n’incuti zabo bizihije imyaka 30 ishize ingabo zari iza RPF-Inkotanyi zihagaritse Jenoside yakorewe Abatutsi ndetse zikanabohora igihugu.
Ku rwego rw’igihugu ibirori byo kwizihiza uyu munsi byabereye kuri Stade Amahoro i Remera.
Perezida Paul Kagame akanaba Umugaba w’Ikirenga w’Ingabo z’u Rwanda (RDF) na Madamu Jeannette Kagame ni bo bari abashyitsi bakuru.
Ibi birori kandi byanagaragayemo abashyitsi bo ku rwego rwa gisirikare bo mu bihugu bya Sri Lanka, Kenya, Tanzania na Uganda.
Akarasisi karyoheye ijisho k’amasibo 12 y’ingabo na Polisi y’u Rwanda, ndetse n’imbyino z’itorero ry’igihugu (Urukerereza), biri mu byanzuze abarenga 45,000 bari bateraniye muri Stade Amahoro.
Perezida Kagame mu ijambo rye yashimye umusanzu Ingabo z’u Rwanda zatanze mu kubohora igihugu, agaragaza ingabo z’u Rwanda n’inzego zarwo z’umutekano nk’ikimenyetso cy’ubumwe n’amahoro.
Umukuru w’Igihugu yunzemo ko kuba amakusanyabitekerezo atandukanye ashyira Ingabo z’u Rwanda ku isonga ry’inzego zifitiwe icyizere n’abaturage kurusha izindi atari ku bw’impanuka, ko ahubwo bituruka ku kuba ingabo zikora ibishoboka byose mu gufata neza abaturage, ikindi zikaba zikorana na bo mu kubaka ibikorwaremezo no kubegereza serivisi z’ubuzima.
Yunzemo ati: “Iri sezerano ry’icyizere twita igihango, ni umusingi igihugu cyacu cyongeye kubakirwaho”.
