Mugisha Bonheur ukina hagati mu kibuga agiye gukinira Al Masry yo mu Misiri nyuma yo kuva muri Stade Tunisien yo muri Tunisia. Iyi kipe yamutanzeho akayabo ka $450,000 arenga miliyoni 600 FRW.
Bonheur ari mu bakinnyi bakomeye b’Abanyarwanda bakinira hagati mu kibuga. Mu mwaka ushize, yatsinze ibitego bitanu muri shampiyona ya Tunisia ndetse aherutse no gutsinda igitego kimwe cyagize uruhare mu gufasha Stade Tunisien kugera ku mukino wa nyuma wa Super Cup batsinze US Monastir.
Nyuma yo gukora ikizamini cy’ubuzima, biteganyijwe ko azerekeza muri Al Masry nyuma yo gukina umukino wa nyuma wa Super Cup uzahuza Stade Tunisien na Espérance Sportive de Tunis tariki ya 3 Kanama 2025.
Al Masry ni ikipe ikomeye mu Misiri yashinzwe mu 1920, ikaba ikinira kuri Suez Stadium yakira abantu 27,000. Mu mwaka ushize, yarangije shampiyona iri ku mwanya wa kane n’amanota 42, ibyo biyihesha itike yo gukina imikino ya CAF Confederation Cup.
Bonheur yanyuze mu makipe atandukanye harimo Heroes FC, Mukura VS, APR FC, Al Ahli Tripoli (Libya), AS Marsa na Stade Tunisien. Asanzwe ari umukinnyi ukina mu ikipe y’Igihugu Amavubi.
