Muhawenimana Jean Claude ukuriye abafana ba Rayon Sports ku rwego rw’igihuhu, yamaze guharikwa muri Friends Fan club abarizwamo ashinjwa imyitwarire mibi no gukomeza gukora ibikorwa bihungabanya ubuyobozi bw’ikipe ya Rayon Sports.
Ni icyemezo Friends Fan Club yafashe kuri uyu wa mbere tariki ya 15 Kamena, nyuma y’inama yahuje abanyamuryango bayo hakurikijwe uburyo bwo kwirinda Covid-19.
Mu ibaruwa ikubiyemo imyanzuro yavuye muri iriya nama, ubuyobozi bwa Friends Fan Club bwatangaje ko Muhawenimana Claude atitwaye neza mu bihe by’ibibazo Rayon Sports yari imazemo iminsi. Ikindi ngo ni uko yasabwe ibisobanuro by’amagambo amaze iminsi atangaza agasuzugura.
Mu ibaruwa hari ahagira hati”Muri ibi bihe bitoroshye ikipe irimo gusohokamo, komite yasanze hari umunyamuryango wa Friends fan club witwa Muhawenimana Claude utaritwaye neza ndetse no muri iki gihe akaba akomeje kuvugwaho hirya no hino ibikorwa byo guhungabanya ubuyobozi bw’ikipe, ibyo bikaba bitagaragaza neza Friends fan club abarizwamo nk’uko n’abanyamuryango bayo bagenzi be bahora babyibaza ku rubuga duhuriraho.”
“Ndetse yananabajijwe impamvu y’iyo myitwarire idahwitse, asabwa gusobanura niba ibyo avugwaho abona ari byo byiza kugira ngo natwe abidusangize tubiganireho (constructive debate) hanyuma nibiba ngombwa ko agaragarizwa ko ibyo arimo ari ubuyobe anisubireho, yiyemeze kugendera mu murongo wa Friends fan club ari na wo w’ikipe muri rusange, ariko akanga kugira icyo avuga ndetse akabisuzugura byose. Nk’uko rero Komite ya Friends Fan Club yabisabwe n’abanyamuryango benshi, hemejwe ko bwana Muhawenimana Claude ahagaritswe by’agateganyo muri Friends Fan club kugeza igihe bizashobokera ko inama rusange yayo yaterana hakigwa icyemezo cya nyuma cyafatwa kuri uwo munyamuryango.”
Muhawenimana Claude yari amaze igihe akorera ubukangurambaga butandukanye mu bitangazamakuru bya hano mu Rwanda, asaba ko Munyakazi Sadate uyobora Rayon Sports yegura ku mirimo ye.
Uyu mugabo anavugwa kuba ari mu batangije ubukangurambaga mu mahuriro y’abafana ba Rayon Sports bwari bugamije gutanga imikono yo gutegura inteko rusange yari kweguizwamo Sadate.
