Ikipe ya Musanze FC yatsinze APR FC igitego 1-0, mu mukino w’umunsi wa 17 wa shampiyona amakipe yombi yari yahuriyemo kuri uyu wa Gatatu.
Iyi kipe yo mu majyaruguru y’igihugu yari yakiriye iy’Ingabo z’Igihugu yaherukaga gutsinda mu myaka irindwi ishize, mu mukino w’umunsi wa 17 wa shampiyona wabereye kuri Stade Ubworoherane.
Igitego cyo mu minota ya nyuma y’umukino cya Imran Nshimiyimana ni cyo cyafashije Musanze FC kwegukana amanota atatu y’uyu mukino waranzwe no gusatirana gukomeye hagati y’impande zombi.
Hari ku mupira uremereye uyu mukinnyi wo hatati mu kibuga wahoze akinira APR FC yatereye kure cyane y’izamu, uruhukira mu izamu rya Ishimwe Pierre.
Musanze FC yahise ifata umwanya wa gatanu n’amanota 27 inganya na AS Kigali iyiri imbere, yarangije uyu mukino ifite abakinnyi 10 bonyine mu kibuga, nyuma y’ikarita itukura yeretswe myugariro w’iburyo Nyandwi Saddam.
Mu yindi mikino yabaye; Gorilla FC yagiye gutsindira Marines FC i Rubavu ibitego 2-1, mu gihe Etoile de l’Est yaguye miswi na Gicumbi FC igitego 1-1.
Kiyovu Sports yo yatsinze AS Kigali igitego 1-0, bituma ikinyuranyo cy’amanota yari hagati yayo na APR FC cyongera kugabanuka.
Igitego rukumbi cya Mugenzi Cédrick cyo ku munota wa 45 w’umukino ni cyo cyafashije Kiyovu Sports kwihimura kuri AS Kigali yari yarayinyagiye ibitego 4-0 mu mukino ubanza.
Iyi kipe y’umutoza Haringingo Francis yahise igira amanota 35 irushwa abiri na APR FC ya mbere.
Iyi Kiyovu kandi irarusha amanota atandatu Mukura VS yatsinze Gasogi United igitego 1-0.
