Hoteli eshatu ziri mu mujyi wa Musanze kuri uyu wa 14 Kamena 2020 zashyizwe mu kato by’agateganyo nyuma y’aho abantu batanu banduye icyorezo cya Covid-19 bazigezemo.
Aya makuru yasakajwe n’abashinzwe gushishikariza abantu kubahiriza amabwiriza yo kurwanya Covid-19. Ubutumwa bugira buti: “Mwiriwe neza, Nabamenyeshaga ko (…) hari abantu batanu babaye positive kuri COVID-19 kandi banyuze muri Hotels 3 zo mu Karere ka Musanze ku tariki ya 5-6/06/2020.”
Izo hoteli zafunzwe ni: Home Inn, Gorilla Hotel na Touristic lodge. Ubutumwa bukomeza buti: “Twahawe amabwiriza ko tuba tuzifunze, abakozi babo bagafatirwa samples, zikabanza zikaba treated mbere y’uko zikomeza gukora.”
Bwiza.com mu gusuzuma niba aya makuru ari impamo, yavuganye n’umwe mu bakozi bo muri izi hoteli [imyirondoro ye ni ibanga] atangaza ko koko bari mu kato muri izi hoteli, “Nta wemerewe kwinjira cyangwa ngo asohokemo.”
Uyu mukozi avuga ko ubu kuri hoteli bakoreramo hari abapolisi ndetse n’abambaye imyenda yabugenewe bari gutera imiti ahantu hose. Amakuru yageze kuri bwiza.com avuga ko ari ko bimeze no ku zindi hoteli ebyiri.
