Umuyobozi wungirije wa APR FC, Brig Gen Firmin Bayingana, yashimiye abakinnyi ba APR FC nyuma yo kugera mu ijonjora rya kabiri rya CAF Champions league, ababwira ko babonye intsinzi nyuma yo kuyikotanira.
APR FC ejo ku Cyumweru ni bwo yageze mu ijonjora rya kabiri muri CAF Champions league, nyuma yo gutsinda Mogadishu City Club yo muri Somalia ibitego 2-1.
MCC ni yo yari yabanje gufungura amazamu muri uyu mukino wabereye kuri Stade ya Kigali i Nyamirambo, ku gitego cyo ku munota wa 24 w’umukino cya myugariro Ahmed Adbullahi Abdi, inarangiza igice cya mbere iyoboye umukino n’igitego 1-0.
Byasabye imbaraga zidasanzwe ngo APR FC yari idafite umutoza mukuru Mohamed Adil Erradi ibashe kubona intsinzi muri uyu mukino wari utoroshye.
Nyuma yo gukora impinduka ikinjiza mu kibuga abakinnyi batatu barimo Nsanzimfura Keddy, Ishimwe Anicet na Mugunga Yves, APR FC yatangiye igice cya kabiri cy’umukino isatira cyane ndetse iza no kubona igitego cyo kwishyura ku munota wa 60 ibifashijwemo na Manishimwe Djabel.
Ni ku ishoti uyu musore yarekuriye inyuma gato y’urubuga rw’amahina umupira uruhukira mu nshundura.
Iyi kipe y’Ingabo z’igihugu yabonye intsinzi ku munota wa 74 ibifashijwemo na myugariro Karera Hassan, ubwo abanya-Somalia bari bananiwe gukiza izamu ryabo nyuma y’umupira wa koruneri.
Gen Bayingana aganira n’abakinnyi ba APR FC nyuma y’uyu mukino, yabashimiye ku kuba barwanye kugeza ku munota wa nyuma.
Ati: “Mubonye intsinzi mwakoze ibishoboka byose mumenya uwo muhanganye. Ikintu cya mbere mu mukino ni ukabanza kumenya uwo muhanganye, ibyo ni byo bitanga intsinzi. Bababanje igitego ariko ntimwacika intege, mwakomeje murakotana mugera ku instinzi. Ni ibyishimo, igisigaye ni ukumenya uwo tugiye guhura na we mu cyiciro gikurikiraho kandi ubuyobozi burabashyigikiye cyane.”
Urugamba rundi Gen Firmin Bayingana yateguzaga abakinnyi ba APR FC ni urwa Etoile Sportive du Sahel yo muri Tunisia bagomba guhurira mu ijonjora rya kabiri rya Champions league.
