Ikipe ya APR FC kuri uyu wa Gatatu yerekanye myugariro Ishimwe Abdul, nyuma yo kumutangaza nk’umukinnyi wayo mushya.
Iyi kipe ibinyujije ku mbuga nkoranyambaga zayo, yagize iti: “Indi ntare yaje mu kipe. Ikaze mu muryango wa APR. Ishimwe Abdoul ni Intare.”
Ni ubutumwa bwari buherekeje amafoto y’uriya myugariro yambaye umwambaro wa APR FC, nyuma yo gushyira umukono ku masezerano yo kuyikinira.
Ishimwe yerekanwe na APR FC nyuma y’uko mu cyumweru gishize Intare FC yamureze yari yatsinze Mukura VS yari amaze umwaka n’igice akinira.
Mu mwaka w’imikino wa 2024/2025 ni bwo Intare yari yatije Ishimwe muri Mukura, ndetse amakipe yombi yumvikana uburyo uyu mukinnyi yagurwa burundu n’iriya kipe yo mu karere ka Huye yagombaga kumutangaho Frw miliyoni 15 Frw ku masezerano y’imyaka ibiri yari asigaranye.
Impande zombi zumvikanye ko Mukura VS yishyura Intare FC miliyoni 10 Frw, andi miliyoni 5 Frw agahabwa umukinnyi wasinye amasezerano y’imyaka itatu muri Kanama 2025.
Mu kwezi gushize ni bwo Intare yandikiye Mukura iyisaba gusesa amasezerano, kuko itubahirijwe ibyo zumvikanye, ndetse ihita ijya kumufata aho yabaga.
Nyuma y’uko Mukura yitabaje FERWAFA, Komisiyo y’Amategeko n’Imiyoborere muri iri shyirahamwe ku wa Gatandatu, tariki ya 31 Mutarama 2026 yanzuye ko Ishimwe Abdoul ari umukinnyi wa Intare FC.
Ni nyuma yo gusanga Mukura itarubahirije ibyo yari yumvikanye n’Intare, n’ubwo iriya kipe yari yamaze kwishyura Frw miliyoni 10.
