Umuvugizi w’Igisirikare cya M23, Lt Col Willy, yanyomoje inkuru zimaze iminsi zivuga ko Ingabo za Leta ya Repubulika Iharanira Demokarasi ya Congo (FARDC) zamuteze igico zikamwica.
Mu ntangiriro z’iki cyumweru ni bwo abanye-Congo babogamiye ku ruhande rwa Leta batangiye gukwirakwiza inkuru z’uko Lt Col Willy Ngoma na Henri Maggie bishwe na FARDC na Wazalendo, nyuma yo gutegerwa igico muri Teritwari ya Rutshuru.
Kuva ku wa Gatatu abanye-Congo bwo bakwirakwizaga ku mbuga nkoranyambaga inkuru z’uko Ngoma yasimbuwe na Oscar Balinda usanzwe ari Umuvugizi wungirije wa M23 mu bya Politiki.
Lt Col Willy Ngoma mu butumwa bw’amajwi yashyize hanze kuri uyu wa Kane tariki ya 16 Mutarama 2025, yavuze ko atigeze apfa.
Ati: “Turi ku wa 16 Mutarama 2025, ndi Lt Col Willy Ngoma. Napfiriye he, ryari? Iriya ni Politiki y’aba Tshisekedi. Barazana FARDC, FDLR, CODECO, Abarundi n’abacanshuro, ariko bari gukubitwa nabi cyane.”
Uyu musirikare yagaragaje ko ntacyo FARDC yageraho mu rugamba ihanganyemo na M23, mu gihe yahisemo kwihuza n’imitwe y’inkozi z’ibibi nka FDLR yakoze Jenoside yakorewe Abatutsi mu 1994 cyangwa CODECO imaze igihe yica abanye-Congo bo mu ntara ya Ituri.
Yunzemo ati: “Njyewe ndi muzima, reka bariya bajinga bavuga ubujinga.”
