Perezida wa Madagascar, Andry Rajoelina yatangaje ko mu cyumweru gitaha bazatangira igerageza ry’urukingo rw’indwara ya Covid-19, ruziyongera ku muti aherutse kwemeza.
Uru rukingo ruzageragerezwa mu kimera cya Artemisia kiboneka muri iki gihugu, kikaba ari nacyo cyabonetsemo uyu muti witwa Covid-Organics Perezida Rajoelina yemeje ko uvura Covid-19.
Uyu Mukuru w’igihugu yemeje ko igeragezwa ku rukingo rwa Covid-19 rizakorwa b’abahanga muri iki gihugu bazifatanya n’abo muri Leta Zunze Ubumwe z’Amerika nk’uko BBC yabitangaje.
Tariki ya 20 Mata 2020 ni bwo Perezida Rajoelina yamuritse ku mugaragaro umuti wa Covid-Organics, awunywera mu ruhame kugira ngo Isi yose imwizere. Hari hamaze gukorwa igerageza, ukiza abantu babiri.
Nyuma y’ubutumwa butandukanye bw’uyu Mukuru w’Igihugu, bagenzi be batandukanye muri Afurika batangiye kumusabaho ngo barebe niba wabakiriza abaturage.
Ubu ngubu ntabwo Umuryango Mpuzamahanga wita ku buzima (WHO) uremeza Covid-Organics nk’urwego rusanzwe rufite ububasha bwo kwemeza imiti n’inkingo z’ibyorezo ndetse wemeza ko imiti nk’iyi rutaremeza hari ubwo yagira ingaruka mbi ku bayinyoye.
