Nibura abantu 44 bapfiriye mu iturika ry’igisasu cyaturikiye muri Pakistan muri mitingi yari yateguwe n’ishyaka rya kisilamu .
Abantu barenga 100 na bo bakomerekeye muri iryo turika ryabereye mu majyaruguru y’uburengerazuba bw’akarere ka Bajaur, aho ishyaka Jamiat Ulema-e-Islam-Fazl (JUI-F) ryakoreraga mitingi.
Polisi yabwiye BBC ko babonye ibimenyetso byerekana ko iturika rishobora kuba ari igitero cy’ubwiyahuzi.
Abapolisi bavuga ko igikorwa cyo gutabara cyarangiye kandi abakomeretse bose bajyanywe mu bitaro.
Abayobozi baraburiye ko abapfuye bashobora kwiyongera, kubera ko abantu 15 mu bakomeretse barembye cyane.
Impamvu yateye icyo gitero ntiramenyekana neza. Inzego z’umutekano zagose ako gace kandi iperereza rirakomeje.
Abantu babarirwa mu magana bari bitabiriye ikoraniro ry’abakozi bo mu ishyaka JUI-F mu mujyi wa Khar, mu karere ka Bajaur, Intara ya Khyber Pakhtunkhwa, hafi y’umupaka na Afghanistan.
