Umunyezamu w’Umunya-Congo Brazzaville, Pavelh Ndzila, usoje amasezerano ye muri APR FC, ashobora gukomereza urugendo rwe muri shampiyona y’u Tanzania.
Amakuru atangazwa n’ikinyamakuru Mpan Média cyo muri Congo Brazzaville yemeza ko ibiganiro na KMC FC bimaze kugera kure.
Pavelh Ndzila yinjiye muri APR FC mu mpeshyi ya 2023, aho yatangiye nk’umunyezamu wa mbere mu mwaka w’imikino wa 2023–2024. Ariko uko umwaka w’imikino wa 2024–2025 wagenze hagati, uyu mwanya yarawutakaje, asimburwa na Ishimwe Pierre, wasoje umwaka ari mu izamu.
KMC FC, ikipe yo muri Tanzania yarangije ku mwanya wa 13 muri shampiyona y’icyiciro cya mbere mu mwaka wa 2024–2025, ni yo iri kugirana ibiganiro bya hafi na Ndzila. Nubwo ibiganiro byabo bimaze gutera imbere, hari icyizere cy’uko Ndzila ashobora no kongera amasezerano muri APR FC, hakaba hategerejwe icyemezo cya nyuma mu minsi mike iri imbere.
Niba Ndzila ahisemo kujya muri Tanzania, bizaba bisobanuye ikindi cyiciro gishya mu rugendo rwe rw’umupira w’amaguru, nyuma y’imyaka ibiri mu Rwanda.
