Perezida Paul Kagame ategererejwe i Riyadh muri Arabie Saoudite, mu ruzinduko rw’akazi agomba kugirira muri iki gihugu cyo mu burasirazuba bwo hagati.
Nta gihindutse Umukuru w’Igihugu azasura Arabie Saoudite mu ntangiriro z’icyumweru gitaha.
Byitezwe ko muri uru ruzinduko azagirana ibiganiro n’abayobozi ba Arabie Saoudite, barimo n’umwami Salman bin Abdulaziz Al Saud.
Ibiganiro by’impande zombi byitezwe ko bizibanda ku ngingo zirimo ubufatanye busanzwe hagati y’u Rwanda na Arabie Saoudite, ibibazo byugarije uturere ibihugu byombi biherereyemo ndetse n’ibyugarije Isi muri rusange.
Arabie Saoudite isanzwe ituranye na Israel, igihugu kimaze hafi icyumweru mu ntambara n’umutwe wa Hamas wo muri Palestine.
Ni intambara imaze kwicirwamo abanya-Israel barenga 1,400 ndetse b’abanya-Palestine barenga 3,000.
Byitezwe ko Perezida Kagame n’abayobozi ba Arabie Saoudite bashobora kuzaganira ku makimbirane y’impande zombi, cyo kimwe n’andi makimbirane nk’ayo muri Sudani ndetse n’uburasirazuba bwa Repubulika Iharanira Demokarasi ya Congo.
Uruzinduko rwa Perezida Kagame i Riyadh ruje rukurikira izo abayobozi mu nzego zitandukanye muri Arabie Saoudite bagiye bagirira mu Rwanda mu minsi yashize.
Muri izo harimo urwo Ahmed bin Abdulaziz Kattan usanzwe ari umujyanama mu rukiko rw’ubwami bwa Arabie Saoudite yagiriye mu Rwanda muri Kanama uyu mwaka.
Ni uruzinduko rwasize yakiriwe muri Village Urugwiro na Perezida Paul Kagame yanashyikirije ubutumwa bwihariye bw’umwami Salman.
U Rwanda na Arabie Saoudite bisanzwe bifitanye umubano mu bya dipolomasi kuva mu 2018, ubwo ibihugu byombi byasinyanaga amasezerano y’ubutwererane.
Muri Kamena 2021, ibihugu byombi byashyize umukono ku masezerano y’ubufatanye hagati y’impande zombi.
U Rwanda na Arabie Saoudite kandi bisanzwe bikorana ubucuruzi mu ngeri zitandukanye zirimo ubwa peteroli iboneka cyane muri Arabie Saoudite mu gihe u Rwanda rudafite uwo mutungo.
Arabie Saoudite iri mu bihugu 10 u Rwanda rwatumijemo ibintu byinshi mu 2020 nk’aho mu Ugushyingo 2020 agaciro kabyo kari miliyoni 5,83$ kavuye kuri miliyoni 6,50$ mu Ugushyingo 2019.
Umubano w’ibihugu byombi wubakiye ku nzego zirimo ubuvuzi, uburezi, ingufu n’ibikorwa remezo.
Andi mahirwe yo kongera ubufatanye ari mu rwego rw’ikoranabuhanga, urw’imari, ubukerarugendo, ubucuruzi n’ishoramari muri rusange.
