Perezida Paul Kagame ategerejwe i Libreville muri Gabon, aho agomba kwitabira umuhango w’irahira rya Perezida w’iki gihugu, Gén. Clotaire Oligui Nguema.
Gén. Nguema azarahirira kuyobora Gabon kuri uyu wa Gatandatu tariki ya 3 Gicurasi, mu muhango uzabera i Libreville.
Ku wa 12 Mata ni bwo uriya Jenerali w’imyaka 50 y’amavuko yatangajwe nka Perezida wa Gabon mu myaka irindwi iri imbere, nyuma yo kwegukana intsinzi mu matora y’Umukuru w’Igihugu n’amajwi 94.85%.
Byari nyuma y’igihe kirenga umwaka n’igice ayobora kiriya gihugu giherereye muri Afurika yo hagati nka Perezida w’inzibacyuho, nyuma yo guhirika Ali Bongo Ondimba wari Perezida wacyo kuva muri 2009.
Usibye Perezida Paul Kagame uzitabira umuhango w’irahira rya Nguema, hari n’abandi bakuru b’ibihugu babarirwa muri 15 bawutegerejwemo.
Barimo Teodoro Obiang Nguéma Mbasogo wa Guinée Equatoriale, Denis Sassou Nguesso wa Congo-Brazzaville, Faustin Archange Touadéra wa Repubulika ya Centrafrique na Mahamat Idriss Déby Itno wa Tchad.
Barimo kandi Bassirou Diomaye Faye wa Sénégal, Umaro Sissoco Embalô de la Guinée Bissau, Gén. Mamady Doumbouya de Guinée-Conakry, Adama Barrow wa Gambie, Félix Antoine Tshisekedi wa Repubulika Iharanira Demokarasi ya Congo na Evariste Ndayishimiye w’u Burundi.
