Petroleos de Luanda yo muri Angola yegukanye igikombe cya Basketball Africa League cy’uyu mwaka wa 2024 nyuma yo gutsinda Al Ahly Ly Sporting Club yo muri Libya amanota 107 kuri 94.
Kuri uyu wa Gatandatu tariki ya 1 Kamena 2024 muri BK Arena hasojwe imikino ya BAL yabaga ku nshuro ya Kane.
Uyu mukino wa nyuma wasize Ikipe ya Clube Atlético Petroleos de Luanda itwaye igikombe, wakurikiwe n’abarimo Perezida Kagame na Madamu Jeannette Kagame.
Saa kumi z’umugoroba mu nzu y’imikino n’imyidagaduro ya BK Arena nibwo uyu mukino watangiye.
Uyu mukino wari uw’ishiraniro waje gusiga Petroleo de Luanda yagiye iyobora umukino maze Al Ahly iyigenda inyuma ndetse biza no kurangira itsinze umukino ku kinyuranyo kinini aho yari ifite amanota 107 kuri 94.
Iyi kipe yo muri Angola yahise yegukana igikombe cya Basketball Africa League 2024 kikaba ari icya mbere itwaye kuko yakundaga kugarukira muri 1/2 ndetse muri 2022 ikaba yari yageze no ku mukino wa nyuma ariko ikaza kuhatsindirwa.
Uyu mukino wa nyuma wa BAL 2024 kandi warebwe na Perezida Kagame ari kumwe na Madamu.
Ni umunsi wa Kane Perezida Kagame yitabiriye iyi mikino ya nyuma yaberaga i Kigali nyuma yo kureba uwo gushaka umwanya wa Gatatu wegukanywe na Rivers Hoopers itsinze Cape Town Tigers ndetse akaba yarebye n’ibiri yabanje mu mpera z’icyumweru gishize.
Petroleos de Luanda yageze hano nyuma yo gusezerera Cape Town Tigers muri 1/2 ni mu gihe Al Ahly yo yari yarageze hano nyuma yo gusezerera Rivers Hoopers muri 1/2 ibifashijwemo n’abarimo Lual Lual Acuil. 
