Perezida Paul Kagame yageze i Conakry muri Guinée, aho yitabiriye umuhango w’irahira rya Gen. Mamadi Doumbouya uheruka gutorerwa kuyobora iki gihugu cyo mu burengerazuba bwa Afurika.
Umukuru w’Igihugu akigera i Conakry ku gicamunsi cyo kuri uyu wa Gatanu, yakiriwe na Minisitiri w’Intebe wa Guinée, Amadou Oury Bah.
Kuri uyu wa Gatandatu tariki ya 17 Mutarama 2026, ni bwo Gen. Doumbouya azarahirira kuyobora Guinée-Conakry mu myaka irindwi iri imbere, mu birori bizabera kuri Stade yitiriwe Gen. Lansana Conte.
Ni nyuma yo gutsinda amatora y’Umukuru w’Igihugu yabaye mu kwezi gushize k’Ukuboza ku majwi 86.7%, nk’uko Urukiko rw’Ikirenga rwa Guinée riheruka kubyemeza.
Doumbouya yari asanzwe ari Perezida w’inzibacyuho wa kiriya gihugu kuva muri Nzeri 2021, nyuma yo gufata ubutegetsi abuhiritseho Prof. Alpha Condé wari umaze imyaka 11 ari Perezida wacyo.
