Perezida wa Uganda Yoweri Kaguta Museveni wa Uganda n’umuhungu we, Lt. Gen. Muhoozi Kainerugaba bashenguwe bikomeye n’urupfu rwa Rtd Col. Shaban Bantariza wahitanwe na Covid-19.
Mu gitondo cyo kuri uyu wa Kabiri tariki 27 Ukwakira ni bwo Col. Shaban Bantariza wari umuvugizi wungirije wa Giverinoma ya Uganda yapfuye azize icyorezo cya Covid 19 nkuko umuvugizi wa Guverinoma Ofwono Opondo yabitangaje.
Col Shaban Bantariza usibye kuba umuvugizi w’ungirije wa Guverinoma , yanabaye umuvugizi w’igisirikare cya Uganda UPDF.
Mu butumwa Perezida Museveni yanyujije ku rubuga rwe rwa Twitter, yagaragaje akababaro gakomeye yatwe n’urupfu rwa Col. Bantariza wari umwe mu bavuga rikijyana mu ishyaka NRM ndetse anamushimira uruhare yagize mu kubohora igihugu no mu iterambere kigezeho uyu munsi.
Yagize ati: ”Nakiriye inkuru ibabaje y’urupfu rwa Col. Shaban Bantariza,yari umugabo w’intangarugero, kandi mushimira cyane uruhare yagize mu rugamba rwo kubohora igihugu n’urwiterambere rya Uganda muri rusange.Yari umukozi mwiza ubereye Uganda. Imana imuhe iruhuko ridashira.
Umuhungu wa Perezida Yoweri Kaguta Museveni akaba n’umujyanawe wihariye mu by’umutekano. Lt . Gen. Muhoozi Kainerugaba yagaragaje ko Uganda ibuze intangarugero mu basirikare ndetse anashimira Bantariza umusanzu yatanze mu ngabo za Uganda. Yagize ati: “Wakoze ibyo wagomba neza kandi mu gihe cya nyacyo, tuzagukumbura cyane nshuti.”
Rt. Col. Shaban Bantariza yabaye umuvugizi w’igisirikare , yari n’umwe mu bavuga rikijyana (Cadre) mu ishyaka NRM riri kubutegetsi. Apfuye afite imyaka 57 y’amavuko, umuhango yo kumuherekeza bwa nyuma ukaba uteganyijwe kuwa Kane tariki 29 Ukwakira 2020.
