Kuri uyu wa Mbere, itariki 12 Kamena 2023, Perezida William Ruto yatangaje ko Kenya yafashe icyemezo cyo guhuriza hamwe abajenerali bahanganye muri Sudani kugira ngo bahoshe ikibazo cyugarije igihugu.
Ruto yagize ati: “Kenya yiyemeje guhura n’abajenerali bombi ba Sudani imbonankubone kugira ngo haboneke igisubizo kirambye kuri iki kibazo”.
Ruto yatangaje ko mu byumweru bibiri, hazashyirwaho inzira y’ubutabazi kugira ngo imfashanyo zigezwe ku baturage bazikeneye nk’uko iyi nkuru dukesha .Yongeyeho ati: “Mu byumweru bitatu biri imbere, tuzatangira inzira y’ibiganiro bihuriweho ku rwego rw’igihugu.”
Ibi byatangarijwe mu nama ya 14 ya IGAD y’abakuru b’ibihugu na za guverinoma yari yitabiriwe n’abayobozi barimo Perezida Ismail Omar Guelleh wa Djibouti, Perezida Salva Kiir wa Sudani y’Epfo, Perezida Hassan Mohamud wa Somalia na Minisitiri w’Intebe wa Ethiopia, Abiy Ahmed .
Mu mutima w’ibibazo byugarije Sudani muri iki gihe hari abasirikare babiri bakuru batavuga rumwe : Abdel Fattah al-Burhan, umuyobozi ukomeye w’ingabo z’igihugu cya Sudani (SAF), na Mohamed Hamdan Dagalo, uzwi ku izina rya Hemedti, umuyobozi w’umutwe witwara gisirikare uzwi nka RSF (Rapid Support Force).
Iki cyemezo kije mu gihe amakimbirane hagati y’ingabo za Sudani na RSF akomeje, ndetse akaba amaze guhitana abantu babarirwa mu 1.000 no gusiga inkomere ibihumbi kuva ku itariki ya 15 Mata.
Na none kandi, Kenya yagaragaje ko ishyigikiye kwagurira Troika y’umuryango wa IGAD muri Sudani, ubu irimo Ethiopia na Somalia.IGAD ni umuryango w’ibihugu umunani bibarizwa mu karere ka Afurika y’Iburasirazuba.
