Perezida wa Repubulika Yunze Ubumwe ya Tanzania, Samia Suluhu Hassan, mu cyumweru gitaha biteganyijwe ko aragirira uruzinduko muri Kenya; kikaba igihugu cya kabiri araba agiriyemo uruzinduko kuva yaba Umukuru w’Igihugu.
Nation dukesha aya makuru ivuga ko yabihamirijwe n’abadipolomate babiri bari mu itsinda ritegura uru ruzinduko rwa Perezida Suluhu.
Uruzinduko rw’uyu Mukuru w’Igihugu byitezwe ko ruzaganirirwamo ibibazo bijyanye n’ubucuruzi byagiye bigaragara hagati y’ibihugu byombi na gahunda y’ubukungu ihuza impande zombi.
Ku nshuro ya mbere ari Umukuru w’Igihugu, Perezida Suluhu yasuye Uganda tariki ya 1 Mata 2021, asinya amasezerano na Perezida Yoweri Museveni yo gutangira gushyira mu bikorwa umushinga wo kubaka ihombo ritwara ibikomoka kuri peteroli rihuza ibihugu byombi.
Mu ijambo yagejeje ku bagize Inteko Ishinga Amategeko tariki ya 19 Mata, Samia Suluhu, yavuze ko afite gahunda yo kongerera imbaraga ubufatanye n’ibihugu byiganjemo iby’Akarere mu bijyanye na dipolomasi y’ubukungu.
Kurikira ibiganiro n’amavidewo binyura kuri Bwiza TV
