Polisi ya Uganda yatangaje ko abakozi bayo mu mutwe wihariye wa Flying Squad n’abagenzacyaha bataye muri yombi umugabo witwa Katende Ali uri mu bayobozi bakuru b’umutwe w’iterabwoba wa ADF.
Umuvugizi wa Polisi, Fred Enanga, yasobanuye ko Katende uzwi nka Mao yafatiwe muri operasiyo yakorewe mu gace ka Nyendo, Masaka kuri uyu wa 25 Ukuboza 2022.
Yasobanuye ko muri Nyendo hafatiwe intwaro zo mu bwoko butandukanye zirimo imbunda 7 zo mu bwoko bwa AK-47, mashini gani (PKM) 1, pisitoli 1 n’ibiturika Katende yari yarahahishe.
Enanga yatangaje ko iperereza ryagaragaje Katende yagize uruhare mu gitero cyagabwe kuri sitasiyo ya Polisi ya Busika tariki ya 31 Ukwakira 2022, cyaguyemo abapolisi batatu: D/IP Bagaluka Alex, PC Ongol Moses na PC Odama Stephen ndetse no mu bwicanyi bwakorewe abasivili babiri: Kalyango Ibra na Nsubuga Peter mu karere ka Butambala.
Igikorwa cyo guhiga abagize uruhare muri ibi bitero imaze ibyumweru bibiri. Polisi yaherukaga kwiciramo babiri bakekwaho gukorana na ADF, batatu barafunzwe, hafatwa imbunda zirimo 9 za AK-47 na PKM imwe.
