Polisi ya Uganda ejo ku wa mbere yataye muri yombi abapolisi babiri bayo bazira kutagaragara bambaye udupfukamunwa, nka rimwe mu mabwiriza yo kwirinda icyorezo cya Covid-19 yashyizweho na Perezida Yoweri Kaguta Museveni.
ChimpReports dukesha iyi nkuru yanditse ko aba bapolisi batawe muri yombi ku itegeko rya Steven Asiimwe, umuyobozi w’akarere ka Kabarole.
Bafatiwe mu mukwabu wo ku isoko ry’ahitwa Mpanga, mbere y’uko yo kujya gufungirwa kuri station ya Polisi ya Uganda iri ahitwa Fort Portal.
Asiimwe usanzwe ari n’umuyobozi wa Task force ishinzwe kurwanya Covid-19 muri ako karere, yavuze ko bitumvikana impamvu abakwiye kubahiriza amabwiriza yo kurwanya Covid-19 ari bo batayubahiriza. Uyu muyobozi kandi yasabye Abagande kumuha amakuru mu gihe cyose bahuye n’ushinzwe umutekano utambaye udupfukamunwa.
Abapolisi ba Uganda batawe muri yombi mu gihe ejo ku wa mbere Perezida Yoweri Kaguba Museveni yatangaje ko guhera ku wa 10 Kamena kwambara agapfukamunwa ari itegeko ku banya-Uganda bari hejuru y’imyaka itandatu y’amavuko, mbere yo kubemerera ko bagomba guhabwa udupfukamunwa tw’ubuntu.
Magingo aya muri Uganda harabarurwa abantu 489 banduye icyorezo cya Covid-19, barimo 79 bagikize. Uganda iri mu bihugu bitanu bya Afurika bitaragaragaramo umuntu utaricwa na Covid-19.
