Protais Zigiranyirazo wahoze ari Perefe wa Ruhengeri ku butegetsi bwa Juvénal Habyarimana ndetse akamenyekana nk’umwe mu bagize ‘Akazu’ kashinjwaga gutegura Jenoside yakorewe Abatutsi mu 1994, yapfuye ku wa 3 Kanama 2025 i Niamey muri Niger.
Urupfu rwe rwemejwe n’umuhungu we, Antoine Mukiza Zigiranyirazo, mu gitondo cyo kuri uyu wa 4 Kanama. Zigiranyirazo yari musaza wa Agathe Kanziga, umugore wa Perezida Habyarimana.
Uyu mugabo yari umwe mu Banyarwanda umunani baheze muri Niger nyuma yo kwangirwa ubuhungiro n’ibihugu bitandukanye.
Yigeze gukatirwa gufungwa imyaka 20 n’Urukiko Mpuzamahanga Mpanabyaha rw’i Arusha ku wa 18 Ukuboza 2008, ariko nyuma y’amezi 11, ku wa 16 Ugushyingo 2009, yagizwe umwere n’urugereko rw’ubujurire.
