Nyuma y’uko Perezida wa Rayon Sports, Thadée Twagirayezu atangaje ko Aruna Moussa Madjaliwa ari mu nzira zo gutandukana nabo, iyi kipe yabengutse kapiteni wa Muhazi nk’umusimbura we.
Uyu mukinnyi mpuzamahanga w’Uburundi amaze igihe kinini adakina kubera imvune yatumye atitabira imikino yo mu gice cya mbere cya shampiyona y’uyu mwaka.
Nubwo amasezerano ye azarangira muri Kamena 2025, ubuyobozi bwa Rayon Sports burimo gutekereza kumurekura muri Mutarama 2025 aho bazahita bashaka uzamusimbura.
Aganira na Radio Rwanda, Thadée yagize ati: “Madjaliwa ntakibarwa nk’umukinnyi wa Rayon Sports.”
Kuri ubu Rayon Sports iri gukurikirana kapiteni wa Muhazi United, Joseph Sackey w’imyaka 22 nk’umusimbura Madjaliwa nk’uko byemezwa na Times Sport.
Ku mukino wa Muhazi United na Rayon Sports wabaye ku wa 5 Ukuboza 2024, Joseph Sackey yigaragaje nk’umukinnyi w’umuhanga, ndetse imikinire ye yashimishije umutoza Robertinho Oliveira.
Rayon Sports ikomeje kwitwara neza muri shampiyona y’u Rwanda ya 2024/25, aho iri ku mwanya wa mbere n’amanota 33 ikaba irusha APR FC ya kabiri amanota umunani nubwo APR FC ifite umukino w’ikirarane.
