Ikipe ya Rayon Sports yemeje ko Mazimpaka André ko ari we mutoza mushya w’abanyezamu bayo mu mwaka w’imikino wa 2024-2025.
Kuri uyu wa Gatatu nibwo ikipe ya Rayon Sports yatangaje ko yamaze gusinyisha uwahoze ari umuzamu wayo Mazimpaka André nk’umutoza w’abanyezamu.
Rayon Sports yatangaje ko Mazimpaka André yasinye amasezerano y’umwaka umwe muri iyi kipe yambara ubururu n’umweru.
Uyu mugabo wari umaze umwaka asezeye ruhago akagana mu kwiga ubutoza, asimbuye kuri uyu mwanya Lawrence Webo wamaze gusezera abakunzi b’iyi kipe.
Mazimpaka André yanyuze muri Rayon Sports mu mwaka wa 2018-2020 ari umunyezamu wayo aho yaje gutwarana igikombe na yo cya shampiyona mu mwaka wa 2018-2019.
