Ikipe ya Rayon Sports yatangaje ko yamaze gutandukana n’umunya-Tunisia Yamen Zelfani wari umutoza wayo mukuru.
Iyi kipe ku rubuga rwayo rwa X yavuze ko “ku bwumvikane bw’impande zombi, umutoza Yamen ZELFANI ntabwo akiri umutoza mukuru wa Rayon Sports.”
Zelfani yari umutoza w’iyi kipe ikunzwe kurusha izindi mu Rwanda kuva muri Nyakanga uyu mwaka.
Rayon Sports yatandukanye na we nyuma y’umunsi umwe iguye miswi na Marines FC ibitego 2-2, mu mukino w’umunsi wa kane wa shampiyona.
Mbere y’aho iyi kipe yari yaranganyije indi mikino ine yaherukaga gukina, irimo ibiri ya CAF Confederation Cup yasize iyi kipe isezerewe na Al Hilal Benghazi yo muri Libya.
