Ubuyobozi bw’ishyaka Dynamique Progressive Révolutionnaire (DYPRO) bwamaganye icyo ryita gushyigikira Guvernoma y’u Rwanda kw’u Bufaransa mu butumwa bwashyikirijwe Ambasaderi w’u Bufaransa muri Repubulika ya Demokarasi ya Congo kuri uyu wa Gatanu nk’uko tubikesha urubuga Actu7.cd .
Muri iyo nyandiko, iri shyaka ribarizwa mu ihuriro ritavuga rumwe n’ubutegetsi, FCC, rygargaje umujiy rifitiye u Bufaransa ridaciye ku ruhande. Kuri DYPRO, ngo “igihugu cya Emmanuel Macron cyahisemo gutangamo igitambo Repubulika ya Demokarasi ya Congo n’Abanyekongo ku nyungu z’agahugu gato k’akanyabyaha k’u Rwanda”.
Paris kimwe n’abandi bagize Umuryango mpuzamahanga wa La Francophonie (OIF) ngo ntacyo bakora ku bukana bw’ibikorwa by’inyeshyamba za M23 bemeza ko zishyigikiwe n’u Rwanda, nk’uko uyu muryango wa politiki ukuriwe na Me Constant Mutamba ukomeza uvuga, wongeraho ko ari “agasuzuguro” kuba uyu muryango wongeye kuyoborwa ku nshuro ya kabiri yikurikiranya n’Umunyarwandakazi.
DYPRO ikomeza yemeza ko igihugu cya Lumumba kizira ubutunzi bwacyo, impamvu ikomeye y ‘”ubugambanyi” buvamo intambara za hato na hato zigirwamo uruhare n’ibihugu by’ibituranyi cyane cyane abanyamuryango ba OIF hamwe n’inkunga ya politiki, imari n’igisirikare by’ibihugu bikomeye, ahanini bikoresha Igifaransa ”.
Ishyaka rya Constant Mutamba, ridashobora gusobanura uburyo igihugu kinini kivuga Igifaransa nka RDC gishobora kuyobora OIF, ntirishobora no kwiyumvisha ukuntu u Rwanda, rivuga ko rwabaye “ku bw’impanuka igihugu kivuga Igifaransa” rushobora gufata ubuyobozi bw’umuryango, mu gihe ruvugwaho ibikorwa by’ubunyamaswa mu burasirazuba bwa Congo.
Mu nyandiko yashyikirijwe Ambasaderi w’u Bufaransa kandi, DYPRO yongeye kwamagana inkunga ya miliyoni 20 z’Amayero Umuryango w’Ubumwe bw’u Burayi uherutse kugenera u Rwanda agenewe kurufasha mu bikorwa byo kugarura amahoro n’umutekano muri Mozambique, ivuga ko iki gikorwa cyababaje Abanyekongo.
