Abayobozi b’umutwe wa M23 baravuga ko kuri uyu wa Kabiri, itariki 24 Ukwakira 2023, Ingabo za Guverinoma ya Kinshasa ku bufatanye n’imitwe itandukanye bakorana bagabye igitero ku baturage b’abasivili muri Kibumba no mu nkengero zaho.
Ibi byatangajwe n’abavugizi ba M23, Laurence Kanyuka ndetse na Major Willy Ngoma,babinyujije kuri twitter.
Laurence Kanyuka yagize ati “Muri aka kanya, ingabo za guverinoma ya Kinshasa (FARDC, FDLR, Abacanshuro n’inyeshyamba z’abareserivisite) ku mabwiriza ya Bwana Tshisekedi bateye abaturage b’abasivili muri Kibumba no mu nkengero za yo.”
#RDCongo 24 octobre 2023, en ce moment, les forces du Gouvernement de Kinshasa (FARDC, FDLR, MERCENAIRES et MILICES Rà‰SERVISTES) sous les ordres de M. Tshisekedi attaquent la population civile à Kibumba et ses environs.
— Lawrence KANYUKA (@LawrenceKanyuka) October 24, 2023
Ku rundi ruhande, Maj. Willy Ngoma, umuvugizi w’ishami rya gisirikare rya M23 rizwi nka ARC, nawe abinyujije kuri twitter yagize ati “Ihuriro rya guverinoma rimaze gutangiza igitero muri iki gitondo cya kare i Kibumba, ARC igomba kwirwanaho no kurinda abaturage…”
Ibi biravugwa mu gihe Umugaba Mukuru wungirije wa FARDC, ushinzwe ibikorwa n’ubutasi, Gen. Jacques Ychaligonza Nduru, kuri uyu wa Mbere yageze muri Kivu y’Amajyaruguru agasura ingabo ziri muri Masisi, aho ngo mu bimuzanye harimo gukosora amwe mu makosa yakozwe no gukaza ibirindiro by’ingabo.
