Ubutegetsi bwa Repubulika Iharanira Demokarasi ya Congo bukomeje kotswa igitutu, nyuma yo guta muri yombi umunyamakuru Stanis Bujakera.
Ku mugoroba wo ku wa Gatanu w’icyumweru gishize ni bwo Bujakera usanzwe ari umuyobozi wungirije w’ikinyamakuru ACTUALITE.CD akanaba umunyamakuru wa Jeune Afrique yatawe muri yombi afatiwe ku kibuga cy’indege mpuzamahanga cya N’djili.
Itabwa muri yombi kugeza ubu ryamaganiwe kure n’abantu ndetse n’ibihugu bitandukanye byarifashe nko “guhonyora uburenganzira bw’itangazamakuru.”
Ibihugu bya Leta Zunze Ubumwe za Amerika, Umuryango w’Ubumwe bw’u Burayi, u Bubiligi u Busuwisi, u Bufaransa n’u Bwongereza, biri mu byamaganye itabwa muri yombi ry’uriya munyamakuru mbere yo gusaba ubutegetsi bwa Congo Kinshasa kumurekura.
Abanyapolitiki barangajwe imbere na Martin Fayulu utavuga rumwe n’ubutegetsi bwa Congo, Dénis Mukwege, Delly Sesanga, abanyamakuru ndetse n’abantu ku giti cyabo na bo bamaganye itabwa muri ry’uriya munyamakuru uri mu bazwi cyane muri Congo.
Bujakera afunzwe azira inkuru yanditswe mu kinyamakuru Jeune Afrique igaragaza ko ubutasi bwa Congo Kinshasa ari bwo bwaba bwaragize uruhare mu rupfu rwa Chérubin Okende wahoze ari Minisitiri w’Ubwikorezi n’Itumanaho muri RDC.
Uyu yiciwe i Kinshasa muri Nyakanga uyu mwaka, gusa iperereza rimaze igihe rikorwa ku rupfu rwe nta mucyo riratanga ku rupfu rwe.
