Mu rugendo amazemo iminsi azenguruka igihugu, Minisitiri w’intebe wungirije wa Repubulika ya Demokarasi ya Congo akaba na Minisitiri w’Ingabo, yasuye Kota-Koli, ikigo cy’imyitozo y’abakomando ba FARDC, giherereye mu birometero 90 uvuye i Gbadolite, umurwa mukuru w’Intara ya Nord-Ubangi.
Aho, Minisitiri Guy Kabombo Muadiamvita yagiranye ikiganiro hamwe n’abasirikare bari mu myitozo, aho yabibukije ihame shingiro ry’igisirikare ari ryo rigira riti: “Ntuzigere uhemukira Congo.”
Muri ibyo biganiro byabaye kuwa Gatanu ushize, uyu munyamuryango wa guverinoma ya Judith Suminwa yanakomoje ku kibazo cy’indege zinyura mu kirere cya Congo n’icy’aborozi ba Mbororo, ngo bacengewemo n’imitwe yitwaje intwaro ya Seleka na Anti-Balaka yo muri Centrafrica.
Yijeje ko iki kibazo gikemurwa mu Nama y’Abaminisitiri na mugenzi we ushinzwe ububanyi n’amahanga nk’uko iyi nkuru dukesha 7sur7.cd ikomeza ivuga.
Nk’uko Guy Kabombo abitangaza, ngo amasezerano y’ubufatanye mu bya gisirikare yashyizweho umukono mu mezi make ashize na Repubulika ya Centrafrica, yemeza ko “itazigera iba ibirindiro by’inyuma byo gutera DRC.”
Mbere ya Kota-Koli, Minisitiri w’ingabo yayoboye inama ya komite ishinzwe umutekano mu Ntara i Gbadolite. Guy Kabombo Muadiamvita yasuye kandi Gemena, muri Sud-Ubangi, aho yagize uruhare mu gutanga ibisobanuro ku bikorwa bya gisirikare muri Nord-Equateur maze avugana n’abagore b’abasirikare.
Yasuye kandi Mbandaka, Boende, na Lisala. Icyari kigamijwe muri uru ruzinduko kwari ugusura uturere twose twa gisirikare muri Grand Equateur hagamijwe kumva ibibazo byabo no kubishakira ibisubizo.
