Urubyiruko rutuye mu mujyi wa Beni mu Ntara ya Ituri muri Repubulika ya Demukarasi ya Congo (RDC), mu gitondo cyo kuri uyu wa 2 Mata 2021 rwafashe imihoro, rujya guhiga abarwanyi b’umutwe witwaje intwaro wa ADF bamaze iminsi bica abaturage.
Nk’uko Actualite dukesha aya makuru yabitangaje, uru rubyiruko rwavuye mu mujyi rwerekeza mu gace ka Lume kegereye umupaka wa Kasindi uhuza RDC na Uganda mu muhanda wa Beni-Kasindi, rushakisha aba barwanyi.
Muri aka gace ka Lume kavuyemo abaturage benshi bahunze ibitero bya ADF uru rubyiruko ngo rurahamara iminsi ibiri rushakisha aba barwanyi bitwaje imbunda.
Urubyiruko rwafashe iki cyemezo nyuma y’igitero gikomeye abarwanyi ba ADF bagabye ku baturage tariki ya 31 Werurwe 2021, bakicamo 33, muri uko kwezi konyine bakaba barishe 158.
Kurikira ibiganiro n’amavidewo binyura kuri Bwiza TV
