Guverinoma ya Repubulika ya Demokarasi ya Congo ikomeje gufata ingamba zikaze zo kurwanya inyeshyamba za M23 igura drones 9 zo kugaba ibitero zakorewe mu Bushinwa zo mu bwoko bwa CH-4. Iki cyemezo ni intambwe igaragara yo kongera ubushobozi bw’igisirikare cya Congo mu guhashya inyeshyamba zikomeje gusaba guverinoma kugirana nazo ibiganiro .
Muri Gashyantare 2023 nk’uko iyi nkuru dukesha urubuga Africamilitaryblog ivuga, nibwo Guverinoma ya Repubulika ya Demokarasi ya Congo yatangaje ko yatumije drones 9 z’intambara zo mu bwoko bwa CH-4 mu Bushinwa. CH-4 ni indege zitagira abadereva zigendera ku butumburuke buringaniye zizwiho kumara igihe kirekire mu kirere kandi zishobora gutwara intwaro zitandukanye zirimo misile na bombe ziraswa ziva mu kirere zijya ku butaka (air-to-surface missiles and bombs).
Icyiciro cya mbere kigizwe na drones eshatu zamaze gutangwa, mugihe esheshatu zisigaye biteganijwe ko zizahagera mu mpera z’uyu mwaka. Izi ndege zitagira abadereva zizaba ziri ku kibuga cy’indege cya gisirikare cya Kavumu giherereye mu ntara Kivu y’Amajyepfo, iri hafi y’ahabera imirwano muri Kivu y’Amajyaruguru.
Iyi nkuru ivuga ko hari ubwoko bubiri bw’izi drones ari bwo; CH-4A na CH-4B. CH-4A ni drone y’ubutasi (ifite ubushobozi bwo gukora kilometero 3500-5000 no kumara amasaha hagati ya 30 na 40 mu kirere), mu gihe CH-4B ifite ubushobozi buvanze bwo kugaba ibitero no gushaka amakuru, ifite intwaro 6 n’ubushobozi bwo kwikorera ibiro 250 kugeza kuri 345 by’ibisasu. Ngo bishoboka ko Guverinoma ya DR Congo yaguze ubu bwoko bwa CH-4B.
Drones eshatu za mbere za CH-4 rero ngo zashyikirijwe DRC muri Gicurasi 2023. Biteganijwe ko izindi zisigaye zizatangwa mu mpera z’uyu mwaka. Guverinoma ya DRC yavuze ko iteganya gukoresha drone ya CH-4 mu kurwanya umutwe w’inyeshyamba M23, wubuye imirwano mu burasirazuba bwa DRC kuva mu 2022.
Kugura indege zitagira abapilote za CH-4 zakozwe n’Abashinwa kwa Guverinoma ya Congo ntabwo ari umwihariko. Ibihugu byinshi bya Afurika, nka Nigeria, Maroc, Misiri, Algeria, na Ethiopia, na byo byahisemo gutumiza no gukoresha indege zitagira abapilote z’Abashinwa kugira ngo zongere ubushobozi bwo kwirwanaho.
By’umwihariko, Nigeria, iri mu bihugu bya mbere bya Afurika byaguze indege zitagira abapilote zo mu bwoko bwa CH-3 zo mu Bushinwa ikoresha mu bikorwa byo kurwanya iterabwoba.
Nubwo kugura indege zitagira abapilote za CH-4 z’Abashinwa kwa Guverinoma ya Congo byerekana iterambere rikomeye mu kurwanya inyeshyamba za M23, ni ngombwa gusuzuma ingaruka zishobora guterwa no gukoresha iri koranabuhanga.
Gukoresha indege zitagira abapilote zitwaje intwaro bitera impungenge ku mpanuka zishobora gutera abasivili b’inzirakarengane, kubahiriza amategeko mpuzamahanga arengera ikiremwamuntu, ndetse no gushobora guhonyora uburenganzira bwa muntu.
