Minisiteri y’Ingabo kuri uyu wa 13 Kamena 2021 yatangaje ko abasirikare b’u Rwanda bari ku burinzi(RDF) bafatiye umusirikare wa Uganda ku butaka bw’u Rwanda, afite ibikoresho birimo imbunda ya mashinigani iringaniye (Medium Machine Gun) n’indebakure (binocular).
Iyi Minisiteri ivuga ko uyu musirikare, Pte Bakuru Muhuba yafatiwe mu Mudugudu wa Majyambere, Akagari ka Kamanyana, Umurenge wa Cyanika mu Karere ka Burera, saa munani n’iminota 45 z’amanywa ku wa 12 Kamena 2021.
Yagize iti: “Yari yambaye impuzankano ya UPDF (igisirikare cya Uganda) ya ‘camouflage’, afite imbunda ya MMG (Medium Machine Gun) irimo amasasu 100, indebakure 1, telefone ngendanwa 1 n’ibyangombwa biranga umusirikare.”
Minisiteri y’Ingabo yatangaje ko iri mu nzira yo kohereza Uganda uyu musirikare.
