Ku mugoroba wo kuri iki Cyumweru cy’itariki ya 13 Kamena 2021, igisirikare cy’u Rwanda (RDF) cyashyikirije icya Uganda (UPDF) umusirikare wacyo waherukaga gufatirwa ku butaka bw’u Rwanda.
Umuhango wo gushyikiriza Uganda uyu musirikare wayo wabereye ku mupaka uhuza ibihugu byombi wa Cyanika, ho mu karere ka Burera mu ntara y’Amajyaruguru.
Ku gicamunsi cyo kuri iki Cyumweru RDF yari yasohoye itangazo rivuga ko ingabo zayo zafatiye ku butaka bw’u Rwanda umusirikare wa Uganda witwa Private Bakuru Muhuba.
Iri tangazo rivuga ko Private Muhuba yafatiwe mu Kagari ka Kamanyana, Umudugudu wa Majyambere ku ruhande rw’u Rwanda.
Itangazo ryagiraga riti: “Ku wa 12 Kamena 2021, ahagana saa 14h45, Ingabo z’u Rwanda zari mu bikorwa byo gucunga umutekano zafashe umusirikare wo mu Ngabo za Uganda witwa Pte Bakuru Muhuba wari ku butaka bw’u Rwanda mu Ntara y’Amajyaruguru, Akarere ka Burera, Umurenge wa Cyanika, Akagari ka Kamanyana, Umudugufu wa Amajyambere.”
“Yari yambaye imyenda y’Igisirikare cya Uganda afite imbunda yo mu bwoko bwa Medium Machine Gun (MMG), amasasu 100, indebakure imwe, telefone imwe n’ibyangombwa bya gisirikare.”
RDF yamaze gushyikiriza UPDF uyu musirikare ndetse n’ibikoresho byose yari afite.
Igisirikare cy’u Rwanda cyasohoye iri tangazo, nyuma y’uko ibinyamakuru bitandukanye byo muri Uganda byari byatangaje ko uyu musirikare yashimuswe n’ingabo z’u Rwanda, ubwo yari kumwe na bagenzi be bacunze umutekano ku mupaka wa Cyanika.
