Ikipe ya Real Madrid yatsinze Manchester City ibitego 3-2 mu mukino ubanza wa 1/8 cya UEFA Champions League 2024/25, wabereye kuri Etihad Stadium ku wa 11 Gashyantare 2025.
Manchester City ni yo yafunguye amazamu ku munota wa 18 ku gitego cya Erling Haaland, nyuma y’umupira wahinduwe na Jack Grealish. Iyi kipe yakomeje gusatira, ariko Real Madrid yihagararaho.
Mu gice cya kabiri, Real Madrid yishyuye ku munota wa 61 ku gitego cya Kylian Mbappé, nyuma y’uko Federico Valverde ateye kufura umupira ugasanga Daniel Ceballos, maze akawuhereza Mbappé wahise atsinda.
Manchester City yongeye kuyobora umukino ku gitego cya penaliti cyatsinzwe na Erling Haaland ku munota wa 80, ariko Real Madrid ntiyacitse intege.
Brahim Diaz yatsinze igitego cyo kwishyura ku munota wa 85, mbere y’uko Jude Bellingham atsinda igitego cya gatatu ku munota wa 90+2, ahesha Real Madrid intsinzi ikomeye.
Umukino wo kwishyura utegerejwe cyane, aho Real Madrid izakira Manchester City mu rugo i Santiago Bernabéu.
Mu yindi mikino yakinwe:
- Paris Saint-Germain yatsinze Brest ibitego 3-0
- Juventus itsinda PSV Eindhoven ibitego 2-1
- Sporting CP itsindwa na Borussia Dortmund ibitego 3-0.
