Umuryango w’Abanyarwanda baba mu Bufaransa n’inshuti z’u Rwanda (CRF), wandikiye Urwego Rugenzura Ibitangazamakuru bikoresha Amashusho n’Amajwi (ARCOM) urumenyesha ko utishimiye ikiganiro Radiyo Mpuzamahanga y’Abafaransa (RFI) iheruka kugirana n’umutwe wa FDLR wiganjemo abagize uruhare muri Jenoside yakorewe Abatutsi mu 1994.
Ku wa 10 Ugushyingo ni bwo RFI yagiranye ikiganiro n’Umuvugizi wa FDLR-FOCA, Lt Col Octavien Mutimura, aho uyu yayibwiye ko uriya mutwe uzakomeza guhangana kugeza igihe u Rwanda ruzemerera ko baganira.
Lt Col Mutimura yagaragaje ko abarwanyi ba FDLR bagumye mu mashyamba ya Congo kubera ko bari kurinda “impunzi z’Abanyarwanda zagizwe intabwa.”
Uyu kandi yashimangiye ko FDLR idateze kurambika intwaro, kandi ko nta bwoba abarwanyi bayo batewe no kugabwaho ibitero mu gihe kiri imbere.
Ati: “Turi hano kugira ngo twirinde, tunarinde impunzi z’Abanyarwanda zagizwe intabwa. Kurambika intwaro ibyo dusaba bitubahirijwe ni inzozi…Iyo uri mu muriro, ntushidikanya ko waterwa.”
Perezida wa CRF, Renzaho Manzi Christophe, yabwiye Radiyo Agasaro kaburanga ko impamvu nyamukuru bareze RFI ari uko yanze gusobanura no kugaragaza abo FDLR ari bo.
Ati: “Ingingo nyamukuru ni uko mu kubaha ijambo batigeze bashyiraho ‘cotexte’, bavuge FDLR abo ari bo, akaba ari umutwe w’inyeshyamba w’abantu basize bakoze Jenoside mu Rwanda. Kandi hano muri kino gihugu ntanze nk’urugero, ntabwo ushobora gufata ibyo bakoze hanyuma ngo ubahe ikiganiro nka kiriya, udasobanuye uti ‘aba FDLR ni aba n’aba’.”
Renzaho yagaragaje ko RFI yemerewe kuganira na FDLR kubera uburenganzira bw’itangazamakuru, ariko ko yakabaye yarabanje kugaragaza abagize uriya mutwe ari abasize bakoze Jenoside yakorewe Abatutsi.
Mu byo Umuryango w’Abanyarwanda baba mu Bufaransa usaba ARCOM, harimo “kwemeza ko habaye ikosa hanyuma bagasaba ko RFI ikosora, ari ugukosora inkuru cyangwa gutanga ikindi kiganiro bakavuga abo [FDLR] ari bo.”
Renzaho yagaragaje ko mu ishyirahamwe ry’Abanyarwanda baba mu Bufaransa habamo abantu bacitse ku icumu rya Jenoside yakorewe Abatutsi mu 1994 bababajwe cyane n’ibyakozwe na RFI.
Yavuze kandi ko iki gitangazamakuru cyayobeje abasomyi bacyo, ashimangira ko nikiramuka kidakosoye ibyo cyasabwe haziyambazwa izindi nzira z’amategeko, ati: “Impamvu turi kuvuga FDLR yamaze abantu mu Rwanda, [FDLR] ikomeje gukora ibyaha bikomeye muri Congo, ntabwo ushobora kuyivuga nk’uha irindi shyaka iryo ari ryo ryose ijambo.”
Yunzemo ko kuva amakimbirane yo mu burasirazuba bwa Congo yatangira RFI n’ibindi bitangazamakuru nka France 24 na TV5 Mondeo basa n’abahinduye umurongo bagenderaho bakabogamira ku ruhande rwa Leta ya Kinshasa, ahanini bitewe no kuba muri kiriya gihugu ari ho bafite isoko kubera umubare w’abantu benshi bumva Ururimi rw’Igifaransa.
