Ubushinjacyaha ku rwego rwisumbuye bwa Rubavu mu cyumweru gishize bwasabiye igihano cy’igifungo cya burundu umugabo ukurikiranyweho kwica umugore we amutemaguye.
Icyaha ashinjwa cyakozwe ku italiki ya 23 Nzeri 2021, ahagana saa cyenda z’ijoro, mu Murenge wa Busasamana, Akarere ka Rubavu, ubwo umugabo yatemaguye umugore we amutemesheje umuhoro aramwica.
Nyuma yo kubona ko amaze kumwica, yahise yishyikiriza police ayibwira ko amaze kwica umugore we.
Iyi dosiye yaregewe urukiko mu buryo bwihuse, maze iburanishirizwa ahabereye icyaha ku wa 26 Ukwakira 2021, uregwa akaba yaraburanye yemera icyaha nk’uko iyi nkuru dukesha Ubushinjacyaha Bukuru ikomeza ivuga.
Ubushinjacyaha bwamusabiye igihano cy’igifungo cya burundu bushingiye ku ngingo ya 107 y’itegeko numero 68/2018 ryo ku wa 30/08/2018 riteganya ibyaha n’ibihano muri rusange.
Biteganyijwe ko urubanza ruzasomwa ku itariki ya 18 Ugushyingo 2021 saa tanu z’amanywa.
