Mu nama nyunguranabitekerezo yahuje abagize ihuriro ry’Ubumwe n’Ubudaheranwa, mu karere ka Rwamagana, yabaye kuwa Kane tariki ya 17 Ukwakira 2024, mu bitekerezo batanze birimo gusaba ko urubyiruko rwakitabwaho muri gahunda yo kwimakaza Ubumwe n’Ubudaheranwa.
Nyuma y’ibiganiro byari biyobowe n’umunyamakuru Titien Mbangukira nawe uvuka mu karere ka Rwamagana, ababyibitabiriye bagarutse ku ruhare rwa buri wese mu guhangana nk’inzitizi zituma ingamba zo gushyira mu bikorwa gahunda y’ubumwe n’Ubudaheranwa zitagerwaho nkuko byifuzwaga .
Nyuma y’ibiganiro bagiranye byari bifite insangamatsiko igira iti “Indangagaciro na kirazira : Isooko y’Ubumwe n’Ubudaheranwa by’Abanyarwanda” bamwe mu babyitabiriye batanze ibitekerezo basaba ko muri gahunda y’ubumwe n’Ubudaheranwa urubyiruko rukwiye kwitabwaho by’umwihariko.
Padiri Twizeyimana Eugene ni umwe mu basabye ko urubyiruko rwitabwaho byihariye mu bikorwa by’Ubumwe n’Ubudaheranwa.
Igitekerezo cyatanzwe Padiri, Twizeyimana Eugene, Padiri Mukuru wa paruwasi Gatolika ya Rwamagana, yasabye ko urubyiruko rwakitabwaho byihariye, rugahabwa inyigisho zirufasha kumenya indangagaciro z’umuco Nyarwanda no kuzivamo imyitwarire myiza .
Yagize ati “Tugomba gukomeza kwigisha abanyarwanda,abashinzwe kwigisha abaturage,bagakwiye kugaruka ku ndangagaciro nyinshi ziri mu muco Nyarwanda.Usanga abenshi izo ndangagaciro batazizi. Dushyire imbaraga mu Muryango kugira ngo abahakurira, bakurire mu mitekerereze myiza.”
Padiri Twizeyimana, yakomeje ati”Abana n’urubyiruko hafi ya bose bari mu mashuri,njye nabo dufatanyije mubyo tubigisha tuzakomeza gushyira imbaraga mu kubafasha kumva Ubumwe n’Ubudaheranwa bw’Abanyarwanda nubwo twari dusanzwe tubikora ariko tugomba twongera imbaraga mu buryo tubyigisha .”
Umuhuzabikorwa w’inama y’Igihugu y’urubyiruko mu Karere ka Rwamagana, Munyaneza Isaac ,nawe mu gitekerezo cye yagararutse ku urubyiruko ndetse asaba ko hakongerwa imbaraga mu kwigisha urubyiruko inyigisho zijyanye n’Uburere Mboneragihugu kugira ngo urubyiruko rusobanukirwe n’amateka y’Igihugu, birufashe kutagaragara mu bagaragaraho ingengabitekerezo ya jenoside n’imvugo zihembera amacakubiri .
Umuyobozi w’Akarere ka Rwamagana wungirije ushinzwe iterambere ry’ubukungu, Richards Kagabo Rwamunono, aganira n’itangazamakuru, yavuze ko ibiganiro ku Bumwe n’Ubudaheranwa biyemeje kuzabigeza ku byiciro byose birimo n’urubyiruko.
Yagize ati ” Icyo twiyemeje muri iri huriro ryacu ,nuko hakorwa ingengabihe y’ibiganiro ,bigomba gukorwa hirya no hino mu mirenge,mu bigo by’amashuri,mu bigo bya Leta n’iby’ abikorera ,tukifashisha inararibonye mu mateka ziri mu bagize ihuriro ,dugasaba buri wese kubakira ku mateka y’Abanyarwanda ,tudahembera amacakubiri tutanahembera na bimwe byagaragajwe nk’imbogamizi zibangamiye Ubumwe n’Ubudaheranwa by’Abanyarwanda.”
Visi Meya Richards Kagabo Rwamunono yavuze ko ibiganiro byo kwimakaza Ubumwe n’Ubudaheranwa bizagezwa ku byiciro byose mu karere ka Rwamagana.
Amb. Nsengimana Joseph,umunyamuryango wa Unity Club intwararumuri wari Intumwa y’uwo Muryango muri iyo nama ,ubwo yasozaga ibiganiro byahuje abagize ihuriro ry’Ubumwe n’Ubudaheranwa mu karere ka Rwamagana ,yabasabye kwagura ibikorwa by’ihuriro ry’Ubumwe n’Ubudaheranwa ,bagashyira imbaraga mu gushyira mu bikorwa ingamba biyemeje muri gahunda y’ubumwe n’Ubudaheranwa kandi zikagezwa no baturage aho batuye mu midugudu.
Amb. Nsengimana Joseph yasabye abagize ihuriro ry’Ubumwe n’Ubudaheranwa mu karere ka Rwamagana kwagura ibikorwa byaryo bikagera no mu midugudu
Imyanzuro y’ihuriro ry’Ubumwe n’Ubudaheranwa mu karere ka Rwamagana harimo kongera imbaraga mu kwigisha urubyiruko kurwanya ingengabitekerezo ya jenoside no kurubwira ibirwangiza birimo gukoresha nabi imbuga nkoranyambaga ,imyemerere itariyo ,imico y’inzaduka ,n’ibindi byangiza ejo hazaza harwo . Harimo kandi guhugura urubyiruko ku buryo bwo gukoresha neza imbuga nkoranyambaga no gushyira imbaraga mu mikorere y’Urunana rw’Urungano .Muri iyo myanzuro harimo no gukundisha urubyiruko umurimo no kwirinda ubunebwe.
Ibarura rusange ryo muri Kanama 2022 ryagaragaje ko Akarere ka Rwamagana gatuwe n’abaturage 484.953 mu gihe urubyiruko rugera ku 130 .746 .
Abajyanama mu Nama Njyanama nabo bari mu bitabiriye ibiganiro.
Abagize inama y’Umutekano itaguye nabo bitabiriye ihuriro ry’Ubumwe n’Ubudaheranwa
Abagize ihuriro ry’Ubumwe n’Ubudaheranwa mu karere ka Rwamagana bahawe umukoro kwita Ku rubyiruko mu kwimakaza Ubumwe n’Ubudaheranwa.
