Minisitiri w’Ubutegetsi bw’Igihugu Dr Mugenzi Patrice,mu butumwa yatangiye mu karere ka Rwamagana mu Ntara y’Iburasirazuba ahatangirijwe ubukangurambaga bwo gutangiza Umwaka w’Ubwisungane mu kwivuza ( Mutuelle de Sante ) yasabye abaturage kwitabira kwishyurira ku gihe imisanzu yabo ya mituweli ndetse asaba abayobozi mu nzego z’ibanze guharanira kwihutisha iterambere ry’imibereho y’abaturage.
Akarere ka Rwamagana katangirijwe ubukangurambaga bwo gukangurira abaturage kwishyura ubwisungane mu kwivuza hifashijwe sisiteme imibereho yasimbuye ibyiciro by’ubudehe byifashishwaga no mu buryo bwo kwishyura ubwisungane mu kwivuza, mu mwaka w’ingengo y’Imari 2024/2025 ubwitabire bwo kwishyura ubwisungane mu kwivuza kageze ku ijanisha rya 89%.
Ubu bukangurambaga bwahujwe n’inteko y’abaturage yabereye mu Mudugudu wa Miyange , Akagari ka Sibagire , Umurenge wa Kigabiro Akarere ka Rwamagana.
Umuyobozi w’Akarere ka Rwamagana, Mbonyumuvunyi yasabye abaturage aka karere bose kwitabira kwishyura ubwisungane mu kwivuza .
Yagize ati “Kuri uyu munsi Nyakubahwa Minisitiri tukaba tubashimira ko mwaje kwifatanya natwe mu bukangurambaga no gutangiza ku mugaragaro umwaka wa mituweli cyangwa ubwisungane mu kwivuza,Akarere ka Rwamagana muri uyu mwaka turimo gusoza wa 2024/2025 tukaba twari kuri 89%. Mu by’ukuri Nyakubahwa Minisitiri tukaba twiyemeje ,mu izina ry’izi Nkomezamihigo w’Akarere ka Rwamagana, ko uyu mwaka mugiye kudutangiriza ko tuzishyura twese mituweli,nagirango niba tubyemeranyaho tubyereke Nyakubahwa Minisitiri.”
Umuyobozi wungirije w’Ikigo cy’Igihugu gishinzwe Ubwitegarize RSSB , Kanyonga Louise yagarutse ku mpamvu zatumye Leta ishyiraho Ubwisungane mu kwivuza.
Yagize ati”Gahunda y’ubwisungane mu kwivuza cyangwa Mituweli yashyizweho na Leta mu rwego rwo kwita ku mibereho y’Abanyarwanda kugira ngo abaturage babone ubuvuzi bunoze budaheza , kugira ngo hatagira umuturage n’umwe ubura ubuvuzi kubera ubushobozi buke . Ibi bikaba byaratumye abanyarwanda bashobora kwivuza mu buryo buboroheye kandi binagabanya ingaruka zaterwaga no kurembera mu rugo kubera kubura ubushobozi bwo kwivuza.
Uyu munsi aho duhagaze ,tugeze ku kigero gishimishije cyane ,mu bwitabire, dufite abanyamuryango miriyoni 11 biyandikishije muri mituweli bangana na 88% bw’Abanyarwanda bose .”
Yakomeje ati”Ibi byagezweho ,tubikesha uruhare rwa buri wese , abaturage mwese muri hano nk’abanyamuryango mwiyandikishije , abayobozi bw’Inzego z’Ibanze,Leta n’abafatanyabikorwa mwese mwarakoze cyane ku bwitange n’umurava mwagaragaje ariko imihigo irakomeje ,nubwo intambwe twagezeho ishimishije cyane , imihigo yacu ikomeza kuba ko abanyarwanda bose 100% bagomba kwivuza ku gihe kandi bitabagoye . ”
Madamu Kanyonga yakomeje yizeza abaturage ko havuguruwe imikorere ya mituweli mu rwego gutanga serivisi nziza ku bakoresha ubwisungane mu kwivuza.
Ati”Ni muri urwo rwego dukangurira abaturage bose badafite ubundi bwishingizi kwishyurira mituweli ku gihe ,kwishimiye kumva ko uyu munsi mwese mwiyemeje kuko nkuko mubizi indwara ntiteguza ,mu rwego rwo kunoza serivisi,hari ibikorwa by’ubuvuzi byiyongereye kubyo mituweli yatangaga Kandi ibi bizatangira gukurukizwa muri Nyakanga Kandi ibi bikaba byaremejwe n’inama y’abaminisitiri .”
Ati “Ikindi twakomojeho dutangira uyu muhango ,hari amavugurura ,mu byo kwishyura mu bigo nderabuzima no mavuriro y’ibanze ( poste de Sante ) kuburyo bazajya babona amafaranga vuba cyane bagashobora kugura imiti n’ibindi bikoresho bikenerwa mu buvuzi ,iyo gahunda ikaba igiye gutangirira mu Ntara yanyu y’Iburasirazuba,mbere y’uko igezwa mu bindi bice .
kugira ngo ibi byose twifuza tuzabigereho ,hari ari ibyo twasabaga by’ingenzi ,icya mbere ni ukureba ko amakuru y’urugo yanditse neza muri sisiteme imibereho,mu gihe musanze amakuru atanditse neza mukagana Akagari bakayakosora mbere yo kwishyura mituweli,ikindi dukomeza kubashishikariza ni ukwihutira kwishyura umusanzu wa mituweli hakiri kare ,ikindi ukwihutira gufata indangamuntu kuko ikenerwa igihe umuntu agiye kwivuza.
Icyo tubasaba kandi ni ukwihutira gufata ikarita ya mituwelikuri bunyamuryango wese utarageza imyaka yo gufata indangamuntu kuko iyo karita ikenerwa igihe agiye kwivuza ,tubibutsa ko ufite mituweli ntarembera mu rugo.”
Minisitiri w’Ubutegetsi bw’Igihugu Dr Mugenzi Patrice , yasabye abayobozi gufasha abaturage kubona serivisi zinoze by’umwihariko izatangira muri sisiteme imibereho harimo na mituweli.
Yagize Ati”Umuyobozi wa RSSB yabivuze neza tugeze kuri 88% mu gutanga mituweli, ariko turacyaburaho 12%,uyu mwaka dutangije wa Mituweli ikifuzo cya mbere nuko twazageza 100% aho kugira ngo dukene tukajyanamo tugakira . Uyu munsi rero nkuko biri mu nsangamatsiko ku rwego rw’Igihugu, umuyobozi mwiza ni ushaka ineza y’abaturage,Kandi akabafasha kugera ku bukungu ,uyu munsi impamvu turi hano ni ukugira ngo dushake icyatuma abaturage bacu bagira imibereho myiza.”
Minisitiri Dr Mugenzi yakomeje avuga ko nta muturage uzongera guhabwa serivisi bashyingiwe ku byiciro by’ubudehe.
Yagize ati ” Turifuza ko umunyarwanda yahabwa serivisi bijyanye n’imibereho ye,tudahereye kubyari bisanzwe bitaga icyiciro ,guhera kuri SEDO kugeza kuri RSSB ,uyu munsi ijambo icyiciro rivuyeho ,guhera uyu munsi nta muntu uzongera kubazwa ngo uri mu cyiciro cya kangahe?Ahubwo bakubaza ngo muri sisiteme imibereho uhagaze gute?ikitwa icyiciro kivuyeho ahubwo hagiyeho sisiteme imibereho.”
Mu mwaka w’ingengo wa mituweli 2024/2025 RSSB yakoresheje miriyari zirenga 80 mu bwisungane mu kwivuza ,amafaranga yakomotse ku misanzu y’abanyamuryango angana na miriyari 30 bingana na 36% . Miriyari 53 yakomotse ku ngingo y’Imari Leta yunganiyemo Ubwisungane mu kwivuza.
