Minisiteri y’Ubuzima mu Rwanda kuri uyu wa 15 Kamena 2020 yatangaje ko hagaragaye abandi bantu 30 banduye Covid-19, bituma umubare w’abamaze kugaragaraho iki cyorezo kuva tariki ya 13 ugera ku 102.
Abarwayi bashya hagaragaye ni abo mu Karere ka Rusizi, abatahuwe ku mupaka wa Rusumo ndetse n’abatashye. Babonetse mu bipimo 2908 byafashwe.
Abamaze gukira iki cyorezo bageze kuri 338 barimo 6 b’uyu munsi.
Tariki ya 13 Kamena, mu Rwanda hagaragaye abarwayi 31 ba Covid-19, tariki ya 14 hagaragara 41. Iyi minsi itatu ni yo igaragayemo umubare munini w’abandura ku munsi. Ni mu gihe, ibipimo byafashwe muri iyi minsi ari 8,446 muri 94,059 byafashwe kuva ku itangiriro.
Muri rusange abamaze kugaragaraho iki cyorezo muri iki gihugu ni 612 abantu 272 ni bo bakirwaye. Abishwe nacyo ni babiri barimo umushoferi w’imyaka 65 y’amavuko n’umupolisikazi w’imyaka 24 y’amavuko.
