Perezida wa Repubulika ya Tanzania, Dr. John Pombe Magufuli yatangaje ko igihugu cye gitekanye, ikaba ari yo mpamvu nta muntu yabonye mu nama yabereye mu ngoro ye yambaye agapfukamunwa kifashishwa mu kwirinda ikwirakwira ry’icyorezo cya Covid-19.
Uyu Mukuru w’Igihugu yongeye kwemeza ko iki cyorezo kitakirangwa muri Tanzania kandi byose byabaye bitewe n’amasengesho abanyagihugu basenze. Ati: “Twahisemo gusenga Imana ngo idukize Coronavirus. Imana yasubije gutakamba kwacu.”
Yakomeje ati: “Ukuri guhari ni uko Tanzania itekanye, ni na yo mpamvu nta muntu muri twe wambaye agapfukamunwa. Bisobanuye se ko tudatinya urupfu? Si ko bimeze, ahubwo ni uko Corona yagiye.”
Ikindi kimenyetso kigaragaza ko Covid-19 itakiri muri Tanzania nk’uko Perezida Magufuli yabitangaje, ni uko indege zikora ingendo mpuzamahanga zikomeje kujyana ba mukerarugendo benshi muri iki gihugu. Yahaye abandi bayobozi umukoro wo kuba abavugizi b’igihugu ayoboye mu mahanga yose.
Nyuma yo kwemeza ko iki cyorezo kitakiri muri Tanzania, abanyagihugu n’abanyamahanga bashaka gukorera ingendo mu mahanga, bagiye guhabwa ibyangombwa byemeza ko batarwaye Covid-19, bazajya batanga mu bihugu bibibasabye. Ibi byangombwa bizajya bigira agaciro k’iminsi 14.
