Mu nteko rusange y’ishyaka ritavuga rumwe n’ubutegetsi muri Tanzania, Chama cha Demokrasia na Maendeleo ( CHADEMA) yateranye kuri uyu wa Mbere yemeje Tundu Lissu nk’umukandida waryo mu matora ateganyijwe mu mpera z’uyu mwaka.
Tundu Lissu yatowe n’ishyaka rye ku bwiganze bw’amajwi nyuma yaho atahukiye avuye mu buhunzi yari amazemo imyaka 3.
Umunyamabanga Nshingwabikorwa w’ishyaka Chadema, Salum Mwalimu yavuze ko Tundu ataragaruka mu gihugu, ishyaka Chadema ryari ryahisemo gutanga Issa Mohamed ukomoka muri Zanzibar nk’umukandika.
Tundu Lissu yatowe ku bwiganze bw’amajwi 405 mu bantu 453 batoye. Mu bandi bari biyamamarije uyu mwanya harimo Lazaro Nyalandu wagize amajwi 36 na Mayrose Majinge ba 10 .
Tundu Lissu watorewe guhagararira Chadema mu matora y’Umukuru w’Igihugu, yagarutse muri Tanzanya ku wa 27 Nyakanga aho yari avuye mu buhungiro mu Bubiligi. Tundu yagiye mu Bubiligi muri Nzeri 2017, nyuma yo gusimbuka igitero cyagabwe ku rugo rwe n’abantu batamenyekanye ku itariki ya 17 Nzeri 2017 mu Mujyi wa Dodoma.
Mu ijambo yagejeje ku banyamuryango b’ishyaka Chadema kuri uyu wa Mbere amaze gutorwa, yasabye Komisiyo y’amatora gukomeza imyiteguro ihagije, aho yibukije ko amatora ari yo agena ahazaza h’igihugu.
Yagize ati: ”Kuva mu 1992, Komisiyo y’amatora yashingwa, yagiye igaragaza kubogamira ku butegetsi bw’ishyaka CCM riri ku butegetsi, ibi bigaterwa nuko iyi komisiyo yayoborwaga n’abarwanashyaka bakomeye bayo. Ibi biradusaba ko twibutsa NEC ko igomba guhindura imikorere mu matora ataha”
Mu matora y’Umukuru w’Igihugu ateganyijwe ku wa 28 Ukwakira uyu mwaka, biteganyijweko Ishyaka CHADEMA rya Tundu Lissu rizaba rihanganye na Chama Cha Mapinduzi iri ku butegetsi kuva iki gihugu cyabona ubwigenge.]
