Mu gihe byari bigoranye ko hari umwirabura wiga muri Kaminuza zo muri Amerika, ku munsi nk’uyu umuny’Afurika y’Epfokazi, Manye Maxeke yanditse amateka asoza kaminuza yaho.
Manye Maxeke Charlote, yavukiye muri Afurika y’Epfo kuwa 07 Mata mu 1874.
Mu buzima bwa Maxeke, yakuze akunda kwiga cyane maze mu 1894 aza kujyana na korari yaririmbagamo bagiye muri Amerika, bagezeyo ahita yigumirayo.
Charlote yahise abona amahirwe yo gukomereza amashuri ye muri kaminuza yitwa Wilberforce yo muri Cleveland yari ishingiye ku idini ry’Abametodisite b’abany’Afurika.
Mu gihe Charlote yigaga muri Wilberforece, yaharaniraga gufasha abandi birabura kwiga kaminuza.
Uyu mukobwa yize ibijyanye na Siyansi muri Amerika aharangiriza icyiciro cya kabiri cya kaminuza.
Charlote yaje guhura n’undi mugabo w’umuny’Afurika witwaga Marshall Mexeke maze barangije amasomo yabo mu 1901 ku itariki nk’iyi ya 20 Kamena bahita bagaruka muri Afurika, Charlote aba aciye agahigo ko kuba umukobwa wa mbere wo muri Afurika urangirije Kamiuza muri Amerika.
Charlote ageze muri Afurika yahise atangira gukora mu kigo Cyitwa Women’s Mite Missionary Society cyo muri Afurika y’Epfo ari nako ashyira imabaraga mu burezi ashaka ko igihugu cye kigira uburezi butajegajega.
Charlote yaje gushakana na Marshall maze banashinga ikigo cy’amashuri muri Afurika y’Epfo bacyita Wilberforce Institute mu majyepfo ya Johannesburg ndetse iki kigo n’ubu kiracyahari.
Iki kigo kugeza uyu munsi kigizwe n’amashuri abanza n’ayisumbuye, bakaba baracyitiriye kaminuza bose bari barizemo muri Amerika.
Charlote yitabye Imana afite imyaka 65, aho nyuma yo gupfa abantu benshi wasangaga bakoresha interuro igira iti “Yari inshuti ya bose, nta n’umwanzi n’umwe yari afite.”
