Inteko ishinga amategeko ya Afurika y’Epfo yaburijemo amasezerano yo kwamamaza ikipe y’umupira w’amaguru ya Tottenham Hotspur yari kugirana n’ikigo cy’ubukerarugendo, SAT (South African Tourism).
Byari byitezwe ko ikipe ya Tottenham igirana na SAT amasezerano y’imyaka itatu y’ubufatanye mu byo kwamamaza afite agaciro ka miliyoni 42.5 z’amapawundi ariko biza kuburizwamo.
Impamvu zitangwa n’Inteko ishinga amategeko yo muri Afurika y’Epfo ziganjemo ikibazo cy’ubukungu kitifashe neza muri iki gihugu.
Iyi nteko ihagarariwe na Tandi Mahambehlala uyobora komisiyo ishinzwe ubukerarugendo, yakomeje ivuga ko mu gihugu hari ikibazo cy’iburura ry’umuriro w’amashanyarazi rya hato na hato ndetse n’amazi meza bityo ko ikihutirwa atari ayo masezerano.
Bivugwa ko aya masezerano yari akubiyemo ko Tottenham Hotspur izajya yamamaza ibinyujije mu myambaro yayo, kwamamaza ku kibuga, ibyapa abakinnyi n’abatoza batangiraho ibiganiro ndetse no gukorera imyiherero imwe n’imwe mu gihugu cya Afurika y’Epfo.
Ukuburizwamo kw’aya masezerano kuje gukurikira andi masezerano y’ubufatanye nk’ayo umuherwe wa Tottenham, Daniel Levy, ari kugerageza gusinya mu gihe ikipe itarabona umuterankunga mukuru ushobora no kwitirirwa sitade.
