Urukiko rwa Istanbul rwatangiye kuburanisha abanya-Saudi Arabia 20 bakekwaho kwica umunyamakuru, Jamal Khashoggi.
Jamal Khashoggi yiciwe muri Ambasade ya Saudi Arabia iri mu murwa mukuru wa Turkey, Istanbul mu Kwakira umwaka 2018.
Muri makumyabiri barimo kuburanishwa harimo 2 bivugwa ko ari abakoranira hafi n’igikomangoma Mohammed bin Salman uzaragwa ubwami bwa Saudi Arabia. Muri bo harimo uhagarariye ubutasi bwa Saudi Arabia.
Khashoggi yagiye agirana amakimbira n’ubwami bwa Saudi Arabia, aturutse ku nyandiko yandikaga abusebya mu binyamakuru bitandukanye yagiye akorera byandikirwa muri Leta Zunze Ubumwe z’Amerika.
Urubanza rutangiye nyuma y’uko imiryango mpuzamahanga ikomeje gushyira igitutu kuri Turkey iyisaba ko yakora iperereza ry’imbitse ku muntu wese wihishe inyuma y’urupfu rwa Khashoggi.
Ubushinjacyaha bwa Turkey bushinja uwari uwoyobozi w’ubutasi bwa Saudi Arabia Ahmed al-Asiri, kuba ari we wayoboye itsinda rigari ryishe rikanasibanganya ibimenyetso.Abandi 18 bashinjwa , Ubushinjacyaha buvuga ko bataraboneka.
Urubanza rwa Jamal Khashoggi rwitabiriye n’intumwa idasanzwe y’Umuryango w’Abibumbye ishinzwe gukurikirana imanza z’ubwicanyi ndengakamere, Agnes Callamard. Iyi ntumwa ya UN ije gukurikirana niba mu buhamya buri butangwe ntaho byahurizwa n’uruhare rw’igikomangoma Mohammed bin Salman.
Saudi Arabia yavuze ko yaburanishije 5 bakeka kwica Khashoggi, 3 muri bo bakatirwa urwo gupfa. Gusa amazina y’ababuranye ntiyatangajwe, ibintu bifatwa nko gutanga ubutabera mu nyandiko gusa.
Jamal Khashoggi yaburiwe irengero, ubwo yari muri Ambasade ya Saudi Arabia, Istanbul. Bivugwako yari yaje gushaka impapuro zimwemerera gusezerana n’umukunzi bari basanzwe babana muri Leta Zunze Ubumwe z’Amerika.
