Ikipe y’Igihugu y’u Bufaransa ‘Les Bleus’ yageze ku mukino wa nyuma w’Igikombe cy’Isi, nyuma yo gusezerera Maroc bari bahuriye muri ½ cy’irangiza ku bitego 2-0.
Amakipe yombi yari yahuriye mu mukino wa ½ cy’irangiza wabereye kuri Stade ya Al Bayt.
Umunota wa kane wonyine w’umukino wari uhagije ngo u Bufaransa bufungure amazamu biciye kuri myugariro Théo Hérnandez, ku mupira yaryamye akawutera mu izamu nyuma y’uko ab’inyuma ba Maroc bari bananiwe gukiza izamu ryabo.
Ni igitego cyakurikiwe n’ubundi buryo bubiri bukomeye bwa Olivier Giroud, burimo ishoti rikomeye yateye rikagonga igiti cy’izamu ndetse n’undi mupira yateye ugaca hanze y’izamu.
Abanya-Maroc babonye uburyo bukomeye biciye kuri Azzedine Ounahi wateye ishoti rikomeye rigakurwamo n’umunyezamu Hugo Lloris.
Mbere gato y’uko igice cya mbere cy’umukino iyi kipe na bwo yashoboraga kubona igitego, gusa umupira Jawad El Yamiq yateye agaramye ugarurwa n’igiti cy’izamu.
Iminota irenga 20 y’igice cya kabiri cy’umukino yaranzwe n’igitutu cyinshi Maroc yokeje u Bufaransa, gusa inanirwa kumena urukuta rw’ubwugarizi bw’u Bufaransa ngo yishyure igitego yatsinzwe.
U Bufaransa bwarangije akazi ku munota wa 79 w’umukino biciye kuri Kolo Muani wari winjiye mu kibuga asimbuye Ousmane Démbéle, nanone nyuma y’uko ba myugariro ba Maroc bari bananiwe gukiza izamu ryabo umupira wari winjiranwe mu rubuga rw’amahina n’abarimo Mbappé.
Maroc yashoboraga kubona impozamarira mu minota ya nyuma y’umukino, gusa umupira Ounahi yateye ugarurirwa ku murongo na myugariro Jules Koundé.
Ni umupira wa kabiri Abafaransa bari bagaruriye ku murongo w’izamu nyuma y’undi wagaruwe na myugariro Ibrahim Konaté.
U Bufaransa bufite Igikombe cy’Isi cya 2018, buzahurira ku mukino wa nyuma na Argentine iheruka gusezerera Croatie iyinyagiye ibitego 3-0.
