Ku wa Kabiri, itariki ya 14 Ukwakira 2025, abantu 25 bafatiwe ibihano na Guverinoma y’u Rwanda kubera iterabwoba no gutera inkunga iterabwoba ku rutonde rushya rw’ibihano rwashyizwe ahagaragara n’Ikigo gishinzwe Ubutasi mu by’Imari (FIC).
Kuri urwo rutonde harimo abagize umutwe wa FDLR, umutwe w’inyeshyamba z’Abanyarwanda ufite icyicaro muri Repubulika ya Demokarasi ya Congo ufitanye isano na Jenoside yakorewe Abatutsi, abo muri RNC, MRCD, FLN n’imitwe yitwara gisirikare iyishamikiyeho.
1. Lt Gen Gaston Iyamuremye
Lt Gen Gaston Iyamuremye, Perezida wa FDLR, uzwi kandi nka Victor Byiringiro Rumuri, ni we muntu wa mbere washyizwe kuri uru rutonde. Iyamuremye, ufite imyaka 76, yavukiye mu Karere ka Musanze kandi ko ubu bikekwa ko atuye i Walikale, mu burasirazuba bwa DR Congo. Uyu kandi ari no mu bantu bafatiwe ibihano n’Akanama gashinzwe Umutekano ka Loni na Guverinoma ya Amerika.
Iyamuremye yagize uruhare mu gutegura no guhuza ibikorwa by’iterabwoba bya FDLR byibasiye u Rwanda, kwambura abantu, gusoresha mu buryo butemewe no gusahura umutungo kamere hagamijwe gutera inkunga ibikorwa by’iterabwoba.
2. Maj Gen Pacifique Ntawunguka
Maj Gen Pacifique ‘Omega’ Ntawunguka ni umuyobozi wa FDLR-FOCA. Kimwe na Iyamuremye, Ntawunguka arashinjwa kugira uruhare mu gutegura no guhuza ibikorwa by’iterabwoba bya FDLR byibasiye u Rwanda, kwambura abantu, gusoresha mu buryo butemewe no gusahura umutungo kamere hagamijwe gutera inkunga ibikorwa by’iterabwoba. Ntawunguka w’imyaka 61, yavukiye mu Karere ka Ngororero, kandi ubu abarizwa i Walikale, mu burasirazuba bwa DR Congo.
3. Col Sylvestre Sebahinzi
Col Sylvestre Sebahizi, uzwi kandi nka Zinga Zinga ZZ, ni umwe mu bagize FDLR akaba n’umukangurambaga ukomeye wo gutera inkunga umutwe w’iterabwoba, cyane cyane mu karere ka Afurika y’amajyepfo. Uyu munyemari w’imyaka 64 wavukiye mu Karere ka Nyabihu, akaba na mwishywa w’uwahoze ari Perezida Juvenal Habyarimana, ubu abarizwa i Lusaka, muri Zambia.
Hagati ya 2006-2009, Sebahizi yategetse ibitero by’iterabwoba igihe yari ‘sector commander’ wa FDLR. FIC yagize iti: “Yabaye kandi umushinjacyaha wa FDLR mu nkiko zayo zishe abaturage benshi b’inzirakarengane muri DR Congo.” Afitanye isano n’uburyo FDLR ibona amafaranga.
4. Maj Alphonse Munyarugendo
Maj Alphonse Munyarugendo, uzwi ku izina rya Monaco Dollar, ni umuhuzabikorwa wa FDLR mu karere ka SADC. Araregwa gushyigikira iterabwoba ku Rwanda. Uyu mugabo w’imyaka 59 yari mu bayobozi ba mbere ba ALIR, yabanjirije FDLR, yagabye ibitero by’iterabwoba ku butaka bw’u Rwanda. Ubu ufite icyicaro i Maputo, muri Mozambique, Munyarugendo ahuza ibikorwa byo gukusanya inkunga yo gushyigikira ibikorwa by’iterabwoba bya FDLR. Yavukiye mu Karere ka Ngororero.
5. Faustin Ntirikina
Faustin Ntirikina, uzwi kandi ku izina rya Pacifique Zigabe, ashinjwa gushakira abarwanyi RUD-Urunana, umutwe w’inyeshyamba zagabye ibitero mu Kinigi, Akarere ka Musanze mu Kwakira 2019. Bivugwa ko akorana na FDLR. Ntirikina afite kandi ubwenegihugu bw’u Bufaransa.
6. Maj Gen Antoine Hakizimana
Maj Gen Antoine Hakizimana, uzwi ku izina rya Jeva, ni umuyobozi mukuru wa gisirikare wa CNRD-FLN, wateguye ibitero by’iterabwoba muri Nyabihu na Kitabi. Bavuga ko afite aho ahuriye n’abayobozi ba FDLR, nka Victor Byiringiro. Hakizimana yavukiye mu Karere ka Nyamasheke mu 1971, kuri ubu afite icyicaro i Bujumbura, mu Burundi.
7. Eric Munyemana
Eric Munyemana ni visi perezida akaba n’umuhuzabikorwa w’ibikorwa by’iterabwoba bya FLN akaba ashinzwe gukusanya inkunga yo gutera inkunga iterabwoba, nk’uko bigaragara ku rutonde rw’ibihano. Munyemana yavukiye mu Karere ka Karongi mu 1972, ubu abarizwa mu karere ka Flanders, mu Bubiligi. Ni umukanishi kandi afite ubwenegihugu bw’u Bubiligi.
8. Dr Innocent Biruka
Dr Innocent Biruka, uzwi ku izina rya Mitali, ni umunyamabanga mukuru wa CNRD-FLN. Yagize uruhare runini mu guhuza itumanaho hagati y’imitwe y’iterabwoba yibasiye u Rwanda kandi yigambye igitero cya FLN mu 2018 cyagabwe ku mudugudu w’icyitegererezo wa Yanze mu Karere ka Nyuguru. Biruka yavukiye mu Karere ka Huye mu 1964, kuri ubu afite icyicaro i Alsace, mu Bufaransa kandi afite ubwenegihugu bw’u Bufaransa.
9. Faustin Kayumba Nyamwasa
Faustin Kayumba Nyamwasa ni umwe mu bashinze Rwanda National Congress (RNC). Uyu mugabo w’imyaka 67 yahamijwe ibyaha adahari byo gutera grenade mu Mujyi wa Kigali hagati ya 2010-2013. Kayumba Nyamwasa, utuye i Pretoria, muri Afurika y’Epfo, bivugwa ko afite aho ahurira n’ubuyobozi bwa FDLR.
10. Dr Emmanuel Hakizimana
Dr Emmanuel Hakizimana ni umwe mu bashinze RNC kandi akorera umutwe wa MRCD. Araregwa gushaka abantu bo gukora ibikorwa by’iterabwoba no gutera inkunga iterabwoba. Ubu afite icyicaro i Montreal, muri Canada, kandi afite aho ahuriye na Kayumba Nyamwasa.
11. Abdulkarim Ali Nyarwaya
Abdulkarim Ali Nyarwaya, uzwi ku izina rya Dick Nyarwaya, ni umwe mu bagize umutwe w’iterabwoba P5. Araregwa gushyigikira iterabwoba ku Rwanda, gushaka no gukusanya inkunga yo gukoresha mu bikorwa by’iterabwoba. Nyarwaya akorera mu majyepfo ya Londres mu Bwongereza, ni inshuti magara ya Kayumba Nyamwasa.
12. Maj Robert Higiro
Maj Robert Higiro, uzwi ku izina rya Gasisi, ni umwe mu bagize umutwe w’iterabwoba wa P5. Kugeza ubu aherereye i Nairobi, muri Kenya, akaba ashinjwa gukusanya inkunga zo gukoresha mu bikorwa by’iterabwoba bya RNC mu karere no gutoza.
13. Frank Ntwali
Frank Ntwali ahagarariye RNC muri Afurika y’amajyepfo kandi yahujije ibikorwa byo gushaka abarwanyi ba RNC-P5. Ntwali ukorera i Johannesburg, muri Afurika y’Epfo, bivugwa ko yafatanyije na FDLR mu gutegura ibikorwa by’iterabwoba ku Rwanda.
14. Ignace Rusagara
Ignace Rusagara ni umunyamuryango wa RNC / P5. Araregwa gushyigikira iterabwoba no guteza imbere intego za FDLR no kurengera ibikorwa byayo. Rusagara afite icyicaro i Maine, muri Amerika, akaba umuvugizi wa RNC.
15. Jean-Paul Turayishimiye
Jean-Paul Turayishimye ni umwe mu bashinze RNC. Araregwa gushyigikira, gushaka abarwanyi no gutegura ibikorwa by’iterabwoba bya RAC-Urunana. Yatorotse igisirikare kandi avugwaho kugira uruhare runini mu gutegura ibikorwa by’iterabwoba bya P5. Afite icyicaro i Washington, muri Amerika, kandi akomeje umubano na FDLR-FOCA.
16. Gaspard Musabyimana
Gaspard Musabyimana ni umucuruzi ufite icyicaro i Buruseli mu Bubiligi. Avuganira imitwe y’iterabwoba. Bavuga ko ashyigikiye cyane FDLR kandi yamamaza ibikorwa byayo.
17. Placide Kayumba
Placide Kayumba arashinjwa kugira uruhare mu ishingwa ry’umutwe witwaje intwaro witwa P5 no kugira uruhare runini mu guhuza FDU na FDLR. Kugeza ubu Kayumba ubarizwa muri Komini ya Namur, mu Bubiligi, bivugwa ko afitanye isano n’Umuyobozi wa FDLR, Victor Byiringiro.
18. Augustin Munyaneza
Augustin Munyaneza, ufite icyicaro i Buruseli mu Bubiligi ni umunyamuryango wa FDU-Inkingi akanashyigikira FDLR-FOCA na P5.
19. Michel Niyibizi
Michel Niyibizi utuye muri Komini ya Tournai, mu Bubiligi, arashinjwa guhuza ibikorwa byo gukusanya inkunga za FDLR-FOCA na P5.
20. Jonathan Musonera
Jonathan Musonera utuye i Londres, arashinjwa gukusanya inkunga zigenewe ibikorwa by’iterabwoba bya New-RNC ku Rwanda no kuvuganira no gushishikariza gukora iterabwoba mu gihugu. Afitanye isano na RNC na Kayumba Nyamwasa.
21. Theogene Rudasingwa
Theogene Rudasingwa, uzwi ku izina rya Redcom, ufite icyicaro i Washington, ari mu bashinze RNC. Avugwaho gutegura ibitero bya grenade byibasiye Kigali mu 2010-2013. Muri 2013, yatangije ubufatanye hagati ya RNC na FDLR-FOCA. Bivugwa ko akorana n’abayobozi ba FDLR, cyane cyane Gen Ntawunguka.
22. Maj Jacques Kanyamibwa
Maj Jacques Kanyamibwa ubarizwa muri FDLR, afite icyicaro i Toulouse, mu Bufaransa. Araregwa gukusanya inkunga yo gutera inkunga iterabwoba no kugira uruhare mu gutegura ibitero bya RUD-Urunana mu 2019 byibasiye Kinigi.
23. Thomas Nahimana
Thomas Nahimana ni perezida w’ishyaka Ishema. Nahimana afite icyicaro i La Havre mu Bufaransa, arashinjwa guhuza imitwe y’iterabwoba no gushishikariza iterabwoba ku Rwanda.
24. Christine Coleman Uwizera
Christine Coleman Uwizera ashyigikiye FLN kandi abarizwa muri Denver, Leta ya Colorado, muri Leta Zunze Ubumwe za Amerika. Araregwa gushishikariza gukora ibikorwa by’iterabwoba mu Rwanda. Afitanye isano na FDLR-FOCA, P5 na FLN.
25. Sylvestre Nduwayezu
Sylivestre Nduwayezu, uzwi ku izina rya Jet Lee, arashinjwa kugira uruhare mu gutegura no guhuza ibitero by’iterabwoba byibasiye u Rwanda no gushaka abarwanyi mu Rwanda na Uganda. Kugeza ubu abarizwa i Kampala, muri Uganda, kandi avugwaho kugirana imikoranire na P5 na RUD-Urunana.
